Emna Frawes - آمنة فراوس

ساعات نهزّ روحي و نهرب منهم  الكلٍْ... نركش مع نفسي نحاول نصفي مخي...نشَرجيه لسوايعات الباقية... نقعد ندور  في عينيا بين الوجوه إلي دايرة بيا... نعرف بعضهم.. حكينا مرة و الا مرتين... فما الي يربطني بيهم كان تصبيحة... و منهم الي لا نطيق  و لا يطيق رغم إنا عمرنا ماحكينا...بطبيعتي ما نحبش ياسر الناس...وقتلي يبدأ لعقل سارح يترمى عليا بن عمي يهزني حذاه.

(إيجة ...علاش تموت عل ڨعدة وحدك ...دنيا تعيطلك ...)

دنيا ولات شوية  شوية شريكتي في بن عمي...وأكثر وقتُ معاها ...كتبة يتبادلها... أشعار... موزيكا و حفلات ... أصحابها ولو أصحاب...و صحابُ..صحابها... هبلات...سهريات...دخلات و خرجات...   

التوشويش علاهم كثر... كل واحد فاهم يبني من محبتهم  لعضهم غناية

و أنا كنت معاهم عايشة  لحكاية....بدات تكبرفي عينيهم كل يوم تزيد شوية.  

هذا هو بن عمي المعصاب...المنظم... يحب دنيا المهبولة... حتى سكرات ولات أغلبها معاها... عمري ما تصورت يحب و يتحب و خاصة دنيا... مرا غير عادية... مستحيل تحب بن عمي العاقل الرزين الي الكلمة ما يطلعها كان في وقتها... يكون حبيب دنيا... الي لايهمها لا باش تباعت و لا باش تشرات ساعات تحسها من عالم آخر غير عالمنا...تجري ليمات بهم...دنيا  تجينا لدار تعدي أيمات معانا ضحكتها كسرت الوحدة الي كنا عايشنها  ... ريحة مزيانة... ولت عندها طعم آخر... ملات علينا وحدتنا و الملل الي كنا نحسوه...فما صخب جديد غير تخونين بن عمي  و كي نوصل مخر للخدمة بن عمي معادش يتغشش...

ومن قهوة الكحلة المرورية ولينا نعمل فطور صباح.... تقلبت حياتنا... أول مره يعمل عيد ميلاد في حياتو عملتهول دنيا... بن عمي تحول إلى رجل أوربي... يتقاسم ... يشارك حبيبتو في كل شي. عركهم  نحس طفولي... بسيط و خفيف كي ضحكتهم... غيرة ...خوف ...امتلاك... محبة...  مشاعر مداخلة...

جاء النهار الي قرروا فيه أنها باش تسكن معانا... و سكنت معانا... و انا نتفرج و ساكت

فرحان باهت،يمكن مصدوم اليوم اكتشفت  بن عمي و الا انا في الأصل محاولتش نعرف أكثر... ضعت مفهمتش روحي نحنا زوز من عيلات بسيطة مخافظة  الشي هذا مش متاعنا... متع المرفهين. و الا هو الحب يخلينا نكسرو كل القيود يخلق فينا تعابير جديدة ...

يمكن هو الحب...

الايمات تجري بينا و إحنا أكثر فأكثر صحاب. وليت نحس بالغيرة... لا مش غيرة هي الوحدة...  رغم الناس الي بداو يجونا لدار ساعة ساعة... النظام العام تكسر...الريتم تبدل ساعات نحس روحي كيني في العشرين... الشي هذا معشتوش قبل لا في ليسي و لا جامعة... انطواء...بسيط... حذر... لا عرفت نغامر و لا نحب  

لين ريتها في ليلة...اكا الليلة... كحيات الف ليلة و ليلة ....

تمنيت روحي شاعر و نكتب فيها قصيدة... و نصوف كل حاجة فها... نصوف الخمسة الي موشمة في رقبتها... و شعرها الي مغطي شطر ظهرها... نوصف الشامة الي على خدها... والعين الكحلة.. ... الخدكالرمانه حمرا و ملاينة... عينايا طاشت فاها...منجمتش نهزهم  من علاها ،كل تفصيل فها يغلبني يرجعني....

عديت الليلة و انا تكحل عليها و راقب في تفصيلها...يا ريتني مشيت و كلمتها... و نقلها... ياريحة الزعتر... ياشاقة الروح و متربعة في الڨلب...يامداوية الجراح... يا مليعة الكبيدة... ياساكنة العيون... كوني خليلة...كوني حبيبة...كوني رفيقة للقلب ضميدة... حط ايدك في يدي يضويلك فيه... في عوض الشمعة عشرة  ...اسمعني ه القصيدة...

و قعد نقول في كلام قعد محبوس بين القلب و الشفايف ...