Emna Frawes - آمنة فراوس

القمرة متصدرة السماء...متربعة ...لابسة خلخالها ...وبناتها  شادين إجنبها  كل وحدة ديامنتة براقا...حط  يد في مكتوب ...تبص راسو وكمل ثنيت يمشي بين الناس هايم يتنهد ...عينيه تحرق حاسس بالڨريصة...في خيالها غارق وحاير  يلوج فيها بين لوجوه ...االخطوة تجرّ الخطوة والخطوة بدات تثقل...النسمة باردة تبنين عليه

محلاها تونس في الخريف ...متغيرة متجددة كل يوم تراها في حُلَةجديدة فيها تناسق  غريب.

راقية تونس جميلة في كل الفصول أوراقها تتلون تتزين على كيف كيفها أحمر على بردڨاني على المرون ..لوريقات تتمايل مع النسمة   يخربش على اليمين واليسار. لخريف حنين بارد ، دافي ..ساكت ..متكلم ...خفيف ....حزين وفرحان يشبه نوارة.

أما ما يشبهنيش.

عندها طلة تفهمها كيفاش كان نهارها.الضحكة سابقتها حكايتها فيهم طعمة خاصة كي أخر قطرة في البيرة  بنتها في آخر رشفة. ...توحشت نشدها من يدّها ونجري بها نجري مناقفش... مانرجعش لتالي حتى لحظة. ما أعلاه الحيط إلي تبنى بني وبينها ...وحاجة اسمها الكبرياء ..قادش نكره هل الكبرياء ... قداش من عشاق كان سبب في نهايتهم هو ألي يولي خطط وحدو ويقرر وحدو وهما يتفرجو مربعين يدهم.      

عرفتهاعامي لول في الخدمة ... إداري في وزارة المالية ...العام هذاكة مبروك عليا ياسر...فرحان بالخدمة و الشهرية ..بديت نتعلم نقسم فليساتي ...هذا للكرا، هذا حوايجات جدد...
ماءو ظاو...وهذم لدار و أكة الغشيرة أختي  تحب الحاجة إلي نجيبهلها.