-شنو حسّيت نهارتها؟

-حسيت الدنيا ضحكتلي، فرحتلي...يدها حلتلي،بالقوي عنقتني... والشمس بعينيها الضاوية غمزتني...حسيت الهوا فرحان بيا ...و شفت روحي في المراية ما عقلتنيش و الضحكة مش على فمي مرسومة،شفتها مرسومة في عينيا...حسّيت اللي عمري وقتها بدى...و ما حسبتش اللي مشى...و نسيت الطيحات،الركزات و الدموع و كدس العزا...تفكرت كان لحظاتي الحلوة...و تصويرتي و أنا غشيرة و براءتي و لعبي وسط أصحابي في الحومة و جرينا و الدوة...تفكرت شجرة الياسمين و اللمة و صوت الهادي الجويني و نسمة الليل...تفكرت كان الحاجات المحلاهم و نجومي فارحين وسط سماهم...و السما صافية من غير غيوم...و حسيت راحة نفسية و محبة توسع الكون...

نهارتها خرجت نجري و نشطح تحت المطر...و نصيح و نقول الحب على غفلة حضر...جاك البلا يا غافل...أما البلا المحلاه...اللي يخلي حوالك مبدلة،نهار بطولو سارح في أرض الله و سماه...

-لهالدرجة؟

-و أكثر...كيما بالماء يعيش الورد، بالحب يحيا القلب...و أنا بالمحبة حييت.