ثما فيئة من الناس مينجموش يتاقلمو مع الوضع الحالي...تحس جايين من كوكب اخر. .ديما الكيت في الوذنين والسرعة في المشية والساقين. ..معندهمش اصحاب برشة يدوبا زوز والا تلاثة ...ملامح وجههم تعيسة العنين محوقةوالشعر هايج مهوش مسرح...واللبسة مفرعسة صباط سبور على دجين والا حتى على كوستيم وكرافات... عادي شعر اللحية ديما هايج  ميتفهمش ...عادي ميكلموكش اصلا متنجمش تحكي معاهم ديما متغششين ...ملامح وجوهم فادة وتاعبة ومحوقة مهيش تضحك وحتى كان ضحكو اعرف راهي ضحكة صفراء ...

هوما ناس تحس هابطين من كوكب زحل والا عطارد ميتفهوش .  ميحملوش التفدليك ...في ايديهم ديما ي كتاب ي كراس يكتبو فيها. ..ديما يسمعو الغناء  الحزين والقديم والانتيكا...ساعات كي تجبد معاهم هدرة كلمة وقص. ..يحكو كان مع الناس الي يحسو براحة ليهم وقتها يتجردو من قوتهم وصلابتهم وملامح وجوهم تتبدل تولي تضحك وفرحانة ومتفر بيهم كان خرجو اكا الغشير الصغير المتخبي وسطهم ...يعشقو الطبيعة والخضرة والسماء والشمس ...حالمين ديما في عينيهم ي لمعة ي بريق تفائل بالزمن الجميل في مدينتهم الفاضلة كيما حلم افلاطون ...تحسهم مأيسين وقالقين ... 

وفي نفس الوقت متفائلين بغد افضل وخير ...يعشقو فيروز وعبد الحليم والحب كلو وام كلثوم وعبد الوهاب.   هاك الاغاني الي يستحيل تسمعو وحتى المغنين شطرهم تحت اللحود...فكرة العزلة والانزواء والهروب من العالم تميزهم ...منعرفش لكن كل تفاصيلهم رمز وفن تي حتى مشيتهم معبية كلام ...ووجيعة مخلطة بالحشمة ...تحس تدمرو برشة من الدنيا وخذاو بايهم وبالوافي من زرارق الحياة ..المجتمع في الاغلب رافضهم والا هوما رافضين الاندماج فيه ...مهمش خوافين بل مغامرين ...صامتين ..واقفين.  ويواجهو مهما كانت المشكلة ....والحاجة متجيهمش بالساهل ولازم صبر ايوب  يوصلو للحلمة الا بعد سنين عذاب هذاك علاش هوما القوة والصلابة والشجاعة .. تجبد معاهم موضوع يحكو معاك كي تسكت انت هوما يسكتو متتكلمش ميتكلموش ...ديما الوحدة والصمت والاغاني وبعض الحزن في ملامح اجسادهم ....ساكتين لين سكاتهم قريب يتكلم ...هادين لين الهدوء باش ينفجر بركان سخون نغر تحرق ... ميلبسوش المشكشك  والالوان الزاهية .. يحبو كان لون واحد الاسود والغامق ...وديما يدايتهم باردة ...وقلوبهم عادة تكون صافية ومتضر حد ...

حتى الاندماج مع المجموعة لا ديما لتالي ... ساعات يجبو موضوع ويبدو يحكو يطفوهم اصحابهم ويقعدو يحكو في الموضوع اذاكا رغملي الموضوع هوما الي جبدوه اما منجموش يتفاعلو فا يسكتو..هوما زادة الي معندهمش حظ لا مع الناس لا مع الدنيا ...كل شي يجي ضدهم ووقت يفرحو من غدوة يحزنو والحاجة الي يتمنواها متصيرش ديما ...ويتعبو على الحلمة ومتتحققش رغم برشة تضحيات وتعب وسهر ودعاء وشي ...هوما زادة الي يحسو بالدنيا مڨردة عليهم ومسيبة العباد وشادتهم هوما ...لا زهر ولا شي ...علاقتهم مع العايلة عادة تكون متوترة مشكلة ميفهمهم حد... حد في العالم مهوش حاسس بكمية الوجعية والحرقة والنيران من براكين البكاء الي داخلهم رغملي هوما يحسو بالاخر ويعاونوه وياقفو معاه اما حد ميلقو وقت الشدة ...هوما زادة الي تلقاهم نهار مع ليل حالين الانترنات وميحكو مع حد ..ويرعبو كي يجيهم انفيطسون من حد والا ابال من نومرو ميعرفوهش والا نوتيفيكاسيون من شخص معين ...هوما الي يشعرو بالمسؤولية في دار الدهك لكلو على اكتافهم وحد مهوش يشعر لو كان يهربو رغملي فكرة الهروب في امخاخهم تدور وتجول  لكن وين باش يمشو والعالم لبرا يخوف وحتى كان مشو معندهمش اصحاب يباتو عندهم ولا حتى يسهرو جميع  يتلزو يهربو للاجبال والطبيعة واللعب مع الحيوانات ..وكي يتسكر باب البيت متاعهم حد ميجرأ ويحلو خاطر عادة الي يدخل عليهم يكشو فيه ومشكل رغم يكشو عليه مضبيهم راهو قعد وحملهم بالقوي وتغرس فيهم وغرس روحو في ضلوعهم خلي تعبهم يتنحى ....

ياسر مشاكل ويحلوها بكل بساطة ...النوم والماكلة حاجة مقدسة عندهم يرقدو لسوايع وفيسع يجرو دوبا ميقومو يتفقدو تليفوناتهم وهوما متاكدين الي حد مهو باش يسأل عليهم اما ميسالش يرعشو ويحلو تليفوناتهم ...الخيبات وضربات الزمن ليهم لا تحصى ولا تعد ...ديما يهربو من صغط العالم ليهم ي بالكتيبة ويفرغو طاقاتهم فيها ي بالنوم والماكلة والانعزال على البشر ...كي يتجرحو يبكو يتعبو يموتو الف موتة خاصة كي حد حبوه وخانهم ...عادي يقتلو ارواحهم وميعملولو شي ...بقدر ما يظهرو اقوياء قدام العالم اما هوما ضعفاء امام انفسهم ...مشكل وين مشكل يستحيل يلقو حد يميزهم ويحبهم كيما هوما حبوه بلعكس يلقو كان الدوني والخايب والخاين والي فيه الطبة الي ما تتخبى ....

....

اهلا بيك انا هنا راني انا قدامك اغزرلي دور وراك ثبت فيا ...شبيك بهت وحبست كمل قتلك انا نعرفك انت اما انت متعرفنيش انا مولى النص هذا واسمي حسام وتونسي حبيت نسلم عليك ونقلك كان بودي نواسيك ونخيطلك جروحك لكن لا انت تعرفني لا انا نعرفك اما باش نقولك بلاهي كمل في حلمتك ...بلاهي يزي من الدموع ....وتحرر من بدنك واخرج لبرا وقول ووري وعري ووري واصخط وحب واضرب وارقص على طار بوفلس ...والبس وزين وحب روحك ...وكانك ياست كيفي هيا نعاودو نبنيو دنيا زينة .. انا كيفك طحت وكنت حتى باش نموت وهاني معاك قدامك نحكي معاك حي نرزق بفضل ربي ...كانك من الناس انا كيفك تدغرت بسيف حامي ومرحمني حد وهاني خليتهم لتالي وانا الي طلعت وصنعت العالم الي نحب نعيش فيه كان انا ...خاطر تعرف حاجة ...عالمنا كذاب مهوش مزيان لا خايب والاخيب منه طبيعة وقلوب بعض البشر لي ميرحمو حد ...اي وانت باش تقعد لهنى معاهم هيا معاي يزيك من التعب هيا نطلعو مع بعضنا هيا نلوجو على ذواتنا في الدنيا وفي الحلم وفي الحب والكتب والاجبال وفي مطرالسماء وزرقة الماء وشميسة الشتاء ...هيا معاي نعاونو ونعطو ونضحكو ونعيطو ونكشخو ويزي ما بكينا ...هيا بينا ناثق في ارواحنا ...هيا نعطو لارواحنا فرصة اخرى...هيا نحلمو من جديد ونتولدو ليوم ونسمو ارواحنا البيبيات مزالو كي تولدو ..هيا راهي الدنيا متستناش

راهي الدنيا متستناش هيا التران باش يفوتنا هيا نعيشو كيما نحبو احنا ...هيا ندافعو على حقوقنا وحرياتنا المنهوبة هيا نغنو حتى كان صوتنا مبحاح ...هيا نرقصو حتى على صوتنا الخايب ...هيا نعملو دورة وعكلة ونعطو مرة اخرى لعيشة مويانة نحنا سلاطينها ونحنا ربان سفينتها ....هيا بينا هيا ...

نحبكم ...