Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

اغزر لروحك محلاك

body-positivity-tunisiaDorsaf Chabchoubi - درصاف الشبشوبي

اخيب حاجة في depression..

انك تقاااوم وحدك.. تقاوم تقاوم لين حيلك يتهد..

و انت من برا تضحك مع الناس الكل..

وفي وجه الناس الكل..

و تاقف مع الي يستحقك..

و تسمع الي يحب يفرغ قلبو..

وتحاول تضحك في وجه الناس الكل..

و انت من داخل..

محطم... مدڨدڨ... ما عندكش الحق باش تنهار..

خاطر رغم الي ظهرك مقسوم و كتافك مخلوعة ساند بيهم غيرك..

ما عندكش الحق اطيح..

ما تنجمش تبكي.. قدام لعباد الي تحبهم..

ما يلزمكش تضهر ضعفك..

فما عباد تاخذ في قوتها منك..

ضحكتك تواسيهم..

و بحكم محبتك ليهم تولي تكبت كل شي لداخل..

تجبد روحك علي جنب..

تسرح...

في تركينة ظلام داخل روحك..

تتعارك مع روحك.. تحاول تسكت..

و تسكت الجوجمة الي في راسك..

و شي.. تغم علي راسك و ترقد..

نومك مقطع.. تفيق عشرة لاف مرة..

تتخض.. و تترعد و تحس الدنيا عليك باش تتهد..

تكره الضوء و النهار..
تقلبها عيشتك في الظلام..

كيف الي معشش في روحك لداخل..

الوجيعة موش غادي..

الي يوجع انك ما تنجمش تحكي...

ما تنجمش تفسر..

خاطر كل شي يتحس..

ما يتحكاش..
وقت الي يسألوك شبيك..

ما تلقى ما تقول...

خاطر الرزين الي تحس فيه.. ما يتفسرش..

حتي وقت الي تحب تبكي..

ما تنجمش خاطر لازمك تفسر..

علاش تبكي ؟!

اغزر لروحك محلاك..

تلبس و تزين و تخرج و تضحك مع اصحابك..

شي ما ناقصك..

تولي ماعادش تنجم تبكي..

اما انت تحب تصييييييييح...

ب أقوى ما فيك من جهد..

تبكي.. قد ما فيك جهد للبكاء..

تحب تعنيقة صافية من غير لا نية ولا كلام...

من غير ملاام...

من غير تخمام..

و تمارس حقك في الانهيار...

خاطر القوة لوقت طويل متعبة..

مكلفة.. تهد..

درصاف الشبشوبي

اغزر لروحك محلاك
Tags:

Vous pouvez lire aussi