في رمضان نلاحظ إلي أمي تطيبلنا الماكلة وتحط الطاولة وتزينها برغم تروح من الخدمة تاعبة ، وظهرها يوجع ، ودايخة من الصيام والعطش والجو ، والطقس لكن برغم هذا تروح تغسل حالتها تصلي العصر وتدخل للكوجينة تطيب من غير حتى كلمة ،

أمي أول من يقوم في الفجر باش تحظرلنا السحور وهي أخر وحدة تاكل في الفطور وقت شقان الفطر خاطر تقعد تصلي وتمد وتحط ، فادة لكن متظرهش ، تاعبة لكن متحبش تقول ، وظهرها يوجع لكن تخير تسكت ومتتكلمش..

أمي الي تغسل ماعون شقان الفطر ، وامي الي تحضر الكريمة وتزينها وتخليها تبرد..امي الي تطيب التاي ..وامي وامي وامك واختك والي حايسة في الكوجينة باش تحضرلك ، تشهيك ، تدللك ، تودك ، وانت ممدود .

وانا صغير كنت نعتقد الي تعمل فيه امي حق عليها انها تعملوا ، وواجب عليها انها تعملوا ، وهذا تعملتوا من الكبارات زعما زعما ومن الرجال زعما زعما  ..

وبالوقت فهمت كمية المسؤولية الي تتحملها امي على خاطرنا  ، والي تعمل فيه على خاطرنا مهوش واجب عليها تعملوا ،بل هي أفعال تأكد شدّة حبها لينا ، وراحتنا هي راحتها ، حتى لو كان ذالك على حساب صحتها ، نفسيتها ، ظهرها الي يوجع ، وتعب الصيام ،وعينيها الي تحب ترقد ..

في تربيتنا والي تعلمناه يقولولنا المرأة  متسمية عليها الكوجينة ، والغسيل  ..وتحضير الطاولة.

والراجل يمّد ساقيه ويرتاح ، ويزيد يسمعها لكلام وتوصل حتى للضرب قال شنوا مرمضن ، فادد ،قول شعليه هو برك صايم ، مرتاح ، كاركْ راقد ويتلكش ، والمرأة تجري لبرا ولداخل وهذا لكل معاجبو شيئ ويوصل ويحل فمو ، الشربة مالحة ، وينو الخبز ، قوم جيبلي الماء البارد ...

وميمس شيئ خاطر كي يغسل والا كيف يمدّ  

رجوليتوا باش تنقص ، منسوب الرجولية الي في بدنو باش يذوب ،،،

كبرت  وليت يد بيد مع أمي ، ونربح دعوة خير ، كبرت وليت نلبس طبيلة الكوجينة وأمي التاعبة تروح تلقى صفرتها منصوبة ، كبرت وفهمت الي راحة امي وسعادة امي فوق كل إعتبار وفوق كل تفكير رجعي ، سلفي ، جاهل ،  معقْد ، يرى في المراة مكينة تخدم الراجل وتنظف للراجل .. وسي الرجّال كان عجباتو الماكلة يضحكلها ..

فهمت الي كي نلقى الشربة مالحة ناكلها ونتبننها ونسكت  ، والسلاطة الي  ماهياش مقصوصة بالباهي نجيبلها سكينة ونعاود نقصها ..والغلة المحطوطة فوق الطاولة نغسلها ونحطها في صحن ونجيبها ، وصحني وصحفتي ومغرفتي نغسلهم وقهوتي نعملها وحدي..
وفي عوض منقول عشاء الليلة ماسط نقول الحمدلله ونبوس ميمتي .

المرأة ( الأم ، والاخت ، والخالة ، وبنت الخالة وأي مراة ) الي تطيب وتتحمل في الصيام ، الي تقضي لداخل ولبرا ، الي تفطر اخر وحدة وتقوم باش تحضر السحور اول وحدة والي تجري في حضوض العائلة ، مهوش واجب عليها ، هي مزية ، هي افعال نبيلة تأكد شدة حبها ليك ، وفي عوض متقول اي كلمة موذية اضحكلها ، ورحم على والديها ومد يديك معاها ،

راهو العادات والتقاليد الڨدم مشاو مع اماليهم القدم وماتو واندثروا ، توا وقتك انت وعاداتك انت وتقاليدك انت الي تصنع القرار وانت ربان سفينك وبوصلة رحلتك ، انت الي تقرر وانت الي تراه صالح لروحك ولعائلتك تمشي بيه موش الآراء الرجعية ،والإيديولوجيات السلفية الجاهلية ..

والرجولية متتقاسش بقداش سبيت من مرة وقداش عيططت من مرة وقداش ضربت من مرة ، وقداش حقرت المرأة من مرة بل هي قداش عاونت من مرة وقداش احترمت ومديت وحطيت ..وعونت وهزيت وقداش حبيت وبشبشت وقداش ضميت لقلبك وقداش عليت لفكرك ...

حسام حفيظ