Zaineb S. - زينب س
الجزء السابق

زبيدة فنانة شعبية تغني بارتو عروسات حفلات مهرجانات و خدمتها تكثر سيرتو فالصيف تهبط عليها لعرابن كيف الشتاء ..هي مطلقة عندها برشا و ما عاودتش عرست بصحتها و صوتها خشين مسترجلة شوية و تموت عالشيخات و السهريات بعد ما تكمل تبرف مع الفرقة تشدهم للعشا و ساعات تطوال بيهم السهرية ..

عندها برشا احباب و اصحاب ..جهدي طاح فالعشاوات و القعدات اما الحاجة الباهية فيها انها كانت عاطيتني قيمتي و قدري مش كيف اللي خدمت معاهم قبل ، و انهار اللي تروح ضاربة عربون باهي تعطيني انا زادة حويجة ساعات زادة تهزني معاها كي يبدا ثمة مهرجان ،نقعد نغزرلها من بعيد نغزر للمسرح لجمهور نحلم و انقول مالمستحيل يجي نهار و انكون كيفها ،بدات حكاية الفن تدخل في مخي و غرامي كبر بيا و رجعتلي حلمة الصغر ..وليت انغني بارتو و في اي وقت نلهي في روحي فالدوش فالكوجينة فالشارع ...

نهار جاتني للا زبيدة : خديجة الليلة حضرلنا عشا قمقوم جاي بحذانا ملحن جديد ..

باهي باهي ..

حضرت و ريقلت ..مع ال7 دق الباب مشيت انحل ..نلقاه راجل فال 32 سنة ابيض مزلق شعرو لتالي و عامل لحية خفيفة ، دخلت بعضي ما فهمتش علاش برغم مستانسة بضياف زبيدة..

عسلامة ..

عسلامة ..

عندي رونديفو مع مدام زبيدة ..

اي اي سي سيف ماو ..اي ..تفضل تفضل ..

دخلتو لصالة و خليتهم يسلمو على بعضهم .ظانا دخلت نجري للكوجينة حسيت حاجة غريبة محلاه يهبل اول مرة يعجبني راجل هكا ، هزيتلهم طبق فيه عصير و انا يدي ترعش ..

تفضل سي سيف ..

هز عينيه و غزرلي :عيشك ..

درت فيسع رجعت لكوجينتي و قعدت انعس عليه و كل مرة انطل بشوية انحب انشوفو ..

نسمع فيه يسلم و قال اللي هو مروح ..من نهارتها و انا نستنا وقتاش يرجع ..نهار جات الفرقة لدار حليت الباب و انا لابسة جبة زرقة خلعة ..

تفضلو مرحبا جيت بش انسكر الباب و ثمة شكون شدو ..شنوة تسكر عليا فالباب ..

اه سي سيف والله لا سامحني ما فيباليش بيك جاي مع الفرقة ..

هههه مش مشكل انفدلك عليك ..

هههه يعيشك (ما فهمتش على شنوة يعيشك قلتها وقتها )

ايا اتفضل مرحبا ..

غزرلي غزرة محلاها و ادخل ...