Zaineb S. - زينب س

ما نجمتش انقولو اجا ادخل ولا نخلط عليه ما عنديش وجه بش نواجهو بعد اللي صارلو في جرتي ، امو اكيد مفجوعة و راي كرهتني نزيد انخمم هكا يشدني لبكا اما منغير صوت تذكرت وليد وين بش يرقد قمت نلوج نلقاش حاجة دخلت لبيت اخرى حليتها نلقاها كلها ماتريال فلاحة و قربج و معون و فيها جرايا متكينها عالحيط جبدتها هزيتها لصالة و فرشتها اللوطة فالقاع بحذا الفرش و رقدت عليها( اكيد مش بش نخليه هو اللوطة مش مطلوب فيا عالاقل يبات مرتاح شوية ، تعدات حكاية نص ساعة مغمضة عينيا اما مخي بش يتحرق و النوم ما حبش يجيني شي نسمع فيه دخل عملت روحي راقدة جا شافني هبط بحذايا عدا يدو ورا ضهري و حملني حطني فوق الفرش ..ما قمتش عاملة روحي راقدة و انا عين بعين نعس عليه نرا فيه نحا مريولو ( يا ميمتي ما بنو ايييه يا شهرزاد توا وقتو ) و كمل نحا سبتة السروال و ترمى فوق الجراية على ضهرو...

بقيت اكاكا ليلة كاملة هو رقد اما انا شي لين الشمس بدات تطلع بش نعست و رقدت ..قمت مخر ما نعرفش قداش الوقت اما رقدت برشا ملقيتوش بحذايا ، نلوج ..وليد وليد وينك ..دخلت للكوجينة نلقى برشا ساشيات فوق الطاولة فيها قضية و ماكلة و ماء و بسكويتو محضر قهوة ، شافني حط القهوة فوق الطاولة و قالي : قهوتك ..وليد منين جبتو هذا الكل ياخي مهدي رجع ..جاوبني بالسيف ..لا ..ماله؟ ..انا جبتهم..نعم !! متقوليش خرجت و مشيت تقضي عادي كاينو ما ثمة شي ..علاش فنان انا و كل يوم نخرج في تلفزة بش يعرفوني ..

وليد متهبلنيش( وليت انصيح ) نرمال انت تلعب بيها لحكاية ..قحرلي و خرج قعدت عالطاولة و بعد ما نجمتش بالغزول ، انطرت الكاس قدامي تكبت القهوة الكل عالطاولة و خلط عليه نلقاه فالصالة يبربش فالشيمينية ..وليد نحكي معاك شنوة قداش بش تقعد ساكت مطفيني جملة و مطبس اللوطة و يشوف فيها ، جبدتو من يدو بالقوي قام وقف و يغزرلي في غزرة جامدة ..بديت ندز فيه في سدرو و نضرب سايي ماعادش نجم نتحكم في اعصابي بعد اللي صار الكل انكلم فيك انكلم فيك جاوبني احكي معايا عاركني اضربني قولي جرتك قولي اللي انت كرهتني اما ما تقعدش ساكت هكا بش تهبلني ..خطفني من يدي شدني بالقوي كبس عليا نحس في صوابعو غطسو في لحمي لين يديا وجعتني و بدا يصيح ..شنوة تحب نقولك اه ..حاجة وحدة نحب نفهمها لسعد شنوة جا يعمل عندك تكلم ..شنوة اللي وصلو يخليه يحط يدو عليك ، يرج فيا و يصيح ..تكلم تكلم نسمع فيك فسرلي .....

انا نبكي بالشهقة ، وليد ما نعرفش عليه جا وحدو ..حليت الباب نلقاه في وجهي دخل ديراكت مازلت نحب نفهم منو علاش جاني تهجم عليا و بعد انت جيت والله هذاكا اللي صار و نبكي نبكي نبكي.. ااااه يا ربي هزني و رتحني علاش حياتي هكا ..قعد يغزرلي شوية و بعد جبدني ليه بالقوي و حملني عصرني بيديه ما فهمت شي واقفة و اكهو و بعد دورت يدي ورا ضهرو شديت فيه بالقوي و بديت نبكي نبكي نبكي ما سيبنيش جملة ما نعرفش قداش بقينا اكاكا لين هديت و سكت ، هزلي راسي شدو بين يديه و مسحلي دموعي قالي : لباس توا رتحت ..اي يا كالعادة شو مريولك كيفاش كلو بليتو ..تبسم ، شعندك فيه ..شدني من يدي و قالي اجا..

تبعتو دخلني لبيت البانو حل السبالة غسلي وجهي حتى من خشمي غسلهولي هههو انا حالتي حليلة ، بعد هزني للكوجينة شدني قعدني عالكرسي ..شنوة بش تعمل ..اقعد وسكت ..عاود جبد لحليب و عملي قهوة ..حطها قدامي ..توا تشربها ..ما عينيش والله مسقمة ..شهرزاااد..باهي باهي اوكي ( نموت عليه كيف يقولي شهرزاد كان قالها يعني ما عادش ثمة فرصة لنقاش و لازم تنفيذها ههه) شربتها و هو قاعد قدامي يغزرلي و يتبسم خلاني فالكوجينة و خرج رجع يبربش فالشمينية ..خلط عليه ..وليد فاش تعمل ..نحب نخدمها ..علاش..شهرزاد في ديسمبر رانا و دنيا هنا تبرد اكثر من تونس ، بدا يريقل فيها مريولو تمسخ قام نحاه و قعد اكاكا عريان و انا نغزرلو و نبلع في ريقي بالسيف بدنو مخدوم ما فيهوش غلطة عضلات ما نحكيش و التاتو اللي عاملو في كتفو زاد فيه الشطر هو مش لاهي بيا جملة مشيت هزيت المريول غسلتو و نشرتو في وسط الدار ...

مشيت للكوجينة نشوف شنوة جاب ..نسمع فيه قال ااي خرجت نجري نلقاه شاد يدو و صبعو يجري بالدم ..وليد شبيك شباها يديك ..لا لا شي عادي ..تي شنوة عادي هاو ثمة دم ..ما نعرفش ثمة لوحة فيها مسمار خارج دخل فيا ..مشيت نجري للكوجينة نلقى papier جابو هو الصباح هزيتو و رجعتلو حطيتها على صبعو و قعدت شادة نازلة عليه باش الدم يكف ..شهرزاد لباس شبيك كبرتها لحكاية ..لا لا علاش هكا بربي خلينا نقعدو فالبرد مش لازم ..ضحك و غمزلي و غزرلي غزرة مش نورمال ..قالي : اي و شكون يدفينا ..

انا تربثت اما مازال شادة يديه بين يديا و عيني في عيني ثمة courant بيناتنا متعدي و هو عريان اكاكا و شعر سدرو زايد فيه رجولية على رجولية كان مغري بطريقة قوية ..قربلي عالاخر شدني من جنبي دورني لصقني عالحيط قدامو و قرب لفمي عالاخر نحس فالنفس متاعو في وجهي ، احنا اكاكا و نسمع في ..صباح الخير يا جماااعة ...ااااا...