Zaineb S. - زينب س الجزء السابق

مشات خديجة غسلت طيبت مسحت و هزت حاجات ما يقاومهاش بدنها للاتها كل يوم عياط صياح و ساعات ادورها ضرب ،راجلها سي مختار راجل مخماخ داه في كرشو و انهار الكل كشاكشو خارجة و بزناس مالبريمة عينو ما تهبطش على خديجة يقعد فالصالة و يبدا يصيح خديجة يا خديجة ..اه نعم سي مختار ..

جيب هذيكا هز هذيكا المهم يقضيها و يراها قدامو تمشي و اتجي ، ايا عاد للاتها بدات اطيرلها و فاقت براجلها ريقتو سايلة عالطفلة ..طفلة صغيرة و مازالت لحم غزال ..تعيط للاتها لسي بوراوي سمسار لبنات و اتقولو هز عليا بش تخليلي داري و تسرقلي راجلي ..بوراوي ينفخ و يسب و يتهدد هالسخطة وحل فيها لا تعل لا تبل ..

اي اكهو من دار لدار هذي معصابة و هذي قبيحة هذي تضربها ..تمرمدت و مشات بين الساقين ، كبرت بين الديار و سمعت و شافت خديجة حكايات ما تجيش عالبال لين وصلت لدار المغنية الشعبية زبيدة ..اكيد تتساءلو علاش نحكي على خديجة كاينها انسان اخر مش انا خاطر خديجة ماتت نسيتها ما نتفكرهاش انا توا شهرزاد....

شهرزاد تولدت في دار زبيدة لمرا هذي خدمت عندها و انا عمري 20 سنة كيف الوردة تفتحت طولت سدري ظهر بدني تملا وليت مرا كاملة الانوثة العينين شهل عسليين شعر ارطب حرير هابط على ضهري و مع ضحكة و تذبيلة من عيني نوصل للي نحب عليه بديت انفيق بروحي ..غزرت الرجال ليا فيقتني نفرح كي نراهم يغزرو نحس بروحي عندي قيمة وليت نتشاف ماعادش خديجة لخديمة اللي ما يراها حد ..و احلى حاجة فيا كانت صوتي .....