أيام زمان

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Nabil Dabbous - نَبِيلْ دَبُّوسْ

زمان في دارنا بيت صغيرة و صالة يتلمو فيها الأهل و الخلان ..

و اليوم دارنا كبير و البيوت كثيرة ما فيها غير اللوطة و الحيطان ..

هذاكا سافر و هذاكا هاجر و هذا طايش و هذا من الدنيا متيقر ..

زمان كان غدانا شربة كذابة مع طرف خبز و رأس بصل و عصير برتڨان ..

نفرشو الأرض و ناكلو من صحن واحد و ضحكتنا يسمعها كل الجير و الجيران ..

و اليوم الطاولة مليانه لحوم و دواجن و صحون أشكال و ألوان ..

أما يا حسرة الكراسي فارغة تتمنى يملاها أهل المكان ..

زمان بالحوش سهرتنا و جدي يحكيلنا قصة كان يا ما كان ..

نشربو التاي منعنع و نڨشرو الڨلوب و ضحكتنا تزينها الأسنان ..

و اليوم سهرتنا تاليفونات و انترنات و شات حتى لين ولينا بخبر كان ..

زمان كنا نسألو على بعضنا و نتزاور و نتلاڨى بالأحضان ..

و اليوم من العيد للعيد نتزاور غصب .. و الڨلوب عڨلوبنا نيران ..

زمان لا مرض الواحد تجمعت عليه الڨرايب و الجيران ..

و اليوم الأخ ما يسترجى يڨول لخوه الحڨني راني تعبان ..

زمان كان الأخ يفدي خوه بكل ما عنده حتى لو بقى جيعان ..

و اليوم تلڨى واحد مش لاڨي خبزة و خوه من العسل شبعان ..

وينك يمّه و وينك يابا .. تشوف الزمان آشعمل بين الإخوان ..

لا عاد الود يجمعهم و لا عادت المحبة بڨلوبهم زي أيام زمان ..

زمان كانت العباد همها ضحكة لا تغدر و لا تدوان ..

و اليوم الكلها تعبات خبث و في كل جيب تلڨى شيطان ..

كان الخير و كانت البركة و كان صفاء النية و الناس الكلها كانت سيّان ..

اليوم إلي مرفوس و إلي بشر الدنيا مهروس و إلي في ظهرو ألف سكين مغروس ..

زمان كان للكبير هيبة و كان الإحترام و اليوم تلڨى كان ڨليل الحياء و الجلطام ..

لا فلان سلم من لسان فلان و لا بقات رحمة في ڨلب أي إنسان ..

العباد للوعود ما صانت و الڨلوب فيسع دوانت و اليوم العشرة هانت ..

زمان المكسي و العاري مستور كيف ما كان ..

اليوم ماعادش نفرقو بين الرجال و النسوان ..

الدنيا خيابت .. تي لا الأهل ولاو عديان و الڨلوب على دين الإسلام غابت ..

اليوم تسمع كان فلانة بايرة و الحرڨة هم كل فلان و شيخ كبير في العمر على الطريڨ مات عطشان ..

زمان كانت الروح خفيفة و الڨلوب صافية نظيفة عفيفة .. لكن أيام زمان ..

زمان الحسد و الكره كان بين العديان و اليوم تنشر و ولى موضة بين الإخوان ..

كيفاش مالا و تحبونا نلومو على الزمان ؟

العيب مش في الزمان العيب فينا و في ڨلب كل إنسان ..

نَبِيلْ دَبُّوسْ

Website Design Brisbane

Tags: