المرى هاذ شنية ذنبها ..

آش دخلها في حسباتكم.. في وسط عمالة السياسين..في الخونة و المجرمين..في وسط المهربين و من والاهم بإحسان من الحاكمين..

في وسط "المجاهدين" اللي يتقربو لربي بريوس و دم الأبرياء المعدمين..

لمرا هاذي شنية اثمها..

آش دخلها في مصالح ناهيبي الثروات من الحقوقيين الإنسانيين و اللي يعونوا فيهم من الأشقاء الأعراب "المسلمين"..

آش دخلها في مارشياتكم و آفارياتكم و سياساتكم..في " إسلام" أبو لهب اللي تحبو تنشرهولنا. .

أنا نقلكم شنية ذنبها...

ذنبها إنها تونسية...

بلادها يرتع فيها المفسدين... هذوكم إلي يبيعوا ذمتهم بزوز فرنك..و يبيعوا بيها أحلام مبروك و خوه باش يكبروا رسلتهم و يرقدو مطمانين..و احلام شباب تونس الي فناوا صغرهم في القرايا

يحبوا يخدموا و يبنيوا بلادهم و يعيشوا مستورين..

هذوكم هوما بيدهم الي يحبوا يرجعوهملنا معززيين مكرميين..بعد ما يتكرموا علينا بتفتوفا من فليساتهم لمسخين..

ذنبها إنها تونسية..

بلادها تصدر في الإرهابيين..

وليداتنا اللي يلعبوا في السبور في الشعانبي.. هذوكم إلي قانون المصالحة يلزموا يشملهم...مالا كان السراقا ينظافوا...السفاحا معاندهمش حق؟ أي مالا...هوما مغرر بهم..في بالهم

برواحهم يجاهدوا..

بعد الي ولات جوامعنا محلولة لكل افاك اثيم...

ذنبها أنها بنت تونس..

من الحكم الواحد...لسياسين ما يهمهم كان في جيوبهم اش عبات و في مناصبهم و برستيجهم..ما يعرفوش الي المناصب مسؤوليات...و انهم عنها مسؤولين.. و لمناظلي التعويضات...و

الخلافة الداعشية..

ذنبها إنها بنت دولة.. تموت رجالها و شرفائها جهار في النهار...و التو لانعرفو لا شكون لا علاش لا كيفاش ماتو...و يا ويلو الي يعرف أي تفصيل.. تجيه جلطة بالوقت حسب طبتنا الشرعيين..

كيفاش ترقد الليل المرا هذي..و كيفاش ترقدوا انتوما و يجيكم نوم...

يا جماعة رانا فايقين..متبعين و فاهمين..

و كان قصيتولنا ريوسنا أجمعين...بلادنا لينا نموت على جالها و فيها عايشين..

يحيا كل شريف فيها البلاد..خدامة و رعات و مسؤولين..

و لعنة ربي على كل خائن و فاسد و مجرم باع بلادو بفرنكين…

في تونس يا أحنا يا نتوما ..

بلادي برجالها بنساها..فايقينيلكم و ماناش ناسين..