أغلب نساء تونس أمهات عازبات ...

رغم هاك الزّداق المخبّي في الڨلص و تصاور الروبة و التصديرة و الراجل اللي لابس كسوة بجنبها ... أغلب الأمهات يخدمو في الشارع و الدار يوصلو الصغار للمدرسة يصرفو من شهاريهم يخممو في كل كبيرة و صغيرة و لنص الليل تبدى واقفة في الكوجينة تكمل في قضية النهار و تحضر في فطور غدوة ... و سي السيد متاعها من الخدمة يتعدى للقهوة و مالقهوة يروح يتمد قدام التلفزة ديما فادد و ينفخ كي التنين ما عاجبو شيء و ما يحب يستعرف بشيء ...

حتى المراجعة لصغارو  يهرب منها  رغم اللي عندو شهادة علمية  و قاري زعما زعما و رغم اللي كاتب على صفحتو في الفيسبوك نساء بلادي نساء و نصف ...

راهو تنجم تكون أم عزباء و عندك صداق ... 

اذيكا علاه أعرف شكون تختار .. أختار الي تنجم تعمل عليه و تلقاه سند ليك اختار انسان ينجم يقيم بروحه موش في شبر ماء يغرق و يبدأ يعيط و ينفخ كالحنش... أختار انسان حنين موش أناني...

ما تعرسش قبل ما  تشوف كيفاه يتصرف خاطر مبعد بش تخلص الفاتورة غالية من صحتك و راحتك و من عمرك ..

وتحية للرجال المسؤولين واللي عند رواحهم وقايمين بمسؤولية عايلاتهم وصغارهم ومتعاونين مع زوجاتهم