آخر فرحة من القلب اليوم دفنتها  

حكاو على الموت اما وجاعها كانت عندي ... صحا للايام و صحا للي بالو خالي!

اليوم نحسد المهبول و نضحك على يحسبها !

و آنا ما حسبت ف يوم و يوم إلي حسبت خرجت بقلبي تحت ساقي لكن قلبي في قفص حطيتو و للبحر رميتو ! نسيتو من تو لآخر لحظة في حياتي ،من تو لكل لحظة باش نبكي لين تذبل دموعي لين النوم يهزني لين الايام تنسيني ! هذا كان نسيت !

آخر خيط و آخر ليلة نوعد فيها قلبي إلي ما يستحق وجاعو ! باش ننسى و نزيد ننسى لين ننسى آنا شكون و منين جيت !

دموع ! دموع باردة كي قلوب ناسي و اصحابي لقيت كان قلبي حنين و الحنانة ماتليق بيهم ! يزي هاو بالي غدوة ينساكم و ينسى قلبو و حالو !

غدوة قلبي يبدى من جديد حياة جديدة حياة بكلها موت و مع كل نسمة ترى قلبي رعش من البرد!! تهنى على بردو و نسى الدنيا و معناها

نسى الفرحة و نس التعب و نسى الوجيعة ب أوجاع نساني و نسى الكل !