، الذاكرة ساعات تخونك ، تكسر الحاجز متاع النسيان وتحب تنكد عليك وترجع بيك ،ترّجعك لتالي ، للماضي ، تحيّي فيك  لحظات ، تفاصيل ، ماتوا من زمان، برّدوا وتجّمدوا  ...

الجوّ مغيّم وأم كلثوم تعزڨ في عروڨ الراس ، الشفة مع جبدة الدخان ، طبيعة ووسع وأنا في عالم آخر ، نتكيف في "الحب الوهمي "الحب إلي أولو محبة وسكر وحلاوة وعسل،  وآخرو منرقد كان بدواء الأعصاب ، وزرارق ، نعكش ، نتبنج ، نتصنصر ، ونستلبس عڨاب الليل ، نسأل علاش ؟ شنوا عملت ؟ وندخل في هيستريا متاع تقطييع وترييش ، وضرب في روحي ، وأنا مطيش فوق فرش حقير ومخدة تتعصر بالدموع  ، منفر بروحي كان في كرهبة الأنبيلونص ، أمي تبكي ، ريحة متنة متاع " السريوم" ،راجل وجهو مقلوب بحّب الشباب يخربلي في يديا بالزرارق، ويحطلي في الإكسجين في خشمي ، الحس يتسمع "وين ون وين ون وين ون " ، "مزال حي "متخافش يا مدام....

ندوخ ، نتخدر ، نموت ،

أمي تسقي فيا في برودو ماسط ، مرّ ، دموع على خدي ، عنين حمراء ، لحية هايجة ، وشعر مكعرش ، وبدن ضعيف ، مهري ، مطيش ، وفرملية ماشية جاية ندخلش في هيستريا تقطيع لشعري ،لبدني، لكل حاجة تخليني حيٌ... سبان " الرب " ،لعن ليه ، لعن للي ساهم في إنجاب أيهم ...

أروى ،

بلوزة بيضة ، كرني صغير في إيديها تقيّد فيه ..وفم يضحك ، وجه حنين ، وكلام دافي ، يرتح ، يهدي ، يسكت ، يلّجم ، السؤال وراء السؤال ، وأنا نجاوب ونتجاوب معاها ، منتفكر كان " إرتاح ، إتمد ، أركح ، رتح مخك ، رتح أعصابك ، ششششششت ، مفما شيئ ،، أيهم تخرج من فمها رقيقة حنينة ، دافية ، "
...
أكتوبر ، نمشي بالپيكيات ، نطيح نشّد في الحيط ، أمي وبابا وأنا "داداش كبروا وعاش" مرّة نطيح ، ومرّة نصيح ..

، ندخل لبيت الراحة ، منجمش نكمل نقوم بالنظافة ، تدخل أمي ، تكمل .. ندخل لبيتي نشرب حرابشي نرقد ...


نوفمبر ، ديسمبر ، جانفي ، فيروز  رجعت ورجعت معاها الشتوية هي تخدم وأنا وسط قهوة فارغة ، كراسي قدم وطواول لوح متاكل على شيرة بالسوس ،،، عم الأخضر يرحي في البن ، نعناع في ڨرنوا ، دنڨري ، ومحرمة فلسطين على أكتافوا ، شناباتوا مفتولة ، وكبوس أحمر ، وبلغة عربي  ، ريحة قهوتي ضربتني ، مبن ريحتها وريحة المطر ، صباح الخير ولدي ، محلى زين ولدي ، تفضل ولدي ، مبنو ومبن صباحو ،

كملت قهوتي ، سكرت كبوطي ،حليت سحابتي ،حطيت كيتي ، وخرجت ، الشوارع في شتاء العباد الي تجري على المطر ، الكلاب والقطاطس المتشردة ، وأنا نمشي ، بوط أكحل ، سروال سبور شيك وكبوط كاشمير أكحل ، بوني وكشكول ، وبخار خارج من فمي ،،


يجيني ميساج على الواتساب  ، منحلش ، نقراه من فوق، منعرفش الرقم ، ومهوش مقيّد في تليفوني ،،
" سمحني " ونقطة مطر تهبط على الإكرون كينها دموع , سكرت تليفوني ، بعد ما فسخت الميساج ، مشيت ، ضربتني نسمة حنينة ، خدودي حمر وأنا ملفوف ، دافي  ، فيروز تعزق في مخي وأنا نمشي ، شريت وردة حمراء شميتها ، تبننتها هي وقهوة عم الأخضر ، دخلت للحماص ، شريت سيڨارو ، شعلتوا ، وكملت طريقي ...