يا ميمتي، متصورتش وأنا خارج اليوم إلي أنا ماعاتش راجع.. يا ميمتي، ماجاش البالي نبوسكم واحد واحد ونودعكم..

خرجت في بالي كي كل مرة نمشي نخدم ونروح نلقى الكسرة الحرة، وناكل من دقيقك وفي ريحتك نتكى.. خرجت وحتى المرا ما سلمت عليها في بالي غدوة نروح نعنقها، خليتها ماخذة في خاطرها مني..

أما الموت عنقني قبل منعنقها هي وفي لحظة خذاني معاه وخلاك إنت غادي..

يا ميمتي، متبكيش.. وكي تجي ترقد في الليل بدعوة خير ليا وأصحابي متنساناش..

يا ميمتي، تهنى وإطمان، هوني مع مرتي عايش مطمان.. ماي منجمتش تتستناني اللوطة يا خي جابت ولدنا وجاتني هوني..

يا ميمتي، رانا مرتاحين هوني لا نعس على رئيس ولا رئيس يخكم فيا.. بالعكس عندي شكون يعس عليا وفي الحفظ مسؤول عليا..

يا ميمتي، رد بالك في التلافيز يتاجروا بيك وبدمعاتي راهم غالين وهوما ميهمهم شيء من القضية..

يا ميمتي، كي يحطولوك غناية خزينة قلهم بدلوا ولدي كان يحب المزود، وعلاه الحزن وهو الفوق قاعد يشطح مع عايلتو..

يا ميمتي، متبكيش وعذب الي في بالهم قتلوني بضحكتك الي من وجهك متناحيهاش..

بقلم سيرين شيخ روحه