شريد وحيد..

خطاويك على طريڨ تحيد..

ساهي و مهموم..

سماك ملبدة غيوم..

ليلك اسود بلاش نجوم..

شاڨي..

علي فكرك ماكش باڨي..

تلاجي..

نارك شاعلة في جواجي..

متغرب..

منهم هارب ماكش مڨرب..

متليّع...

العينين بالدموع تفيّع...

ضايع...

و الثنية مضيّع..

هارب.زارب.. داخل تحارب.. في شكون.. مع شكون.. علاش.. و كيفاش.. و حتي لوقتاش..

موش فاهم..؟

العركة عركتك و الحرب صنيعك.. و كأنك علي العشرة الكلها عالمصلحة تبيعك..

هايض.. ڨايض.. ماكش رايض...

ڨلبك محروڨ و دمك فايض...

مازلت تلاجي.. تناجي..  أرضك عجاجي وريحك عجعاجي..

خراب... وجودك سراب بلاش أسباب...

ما تسألش... اسكت..

امشي.. ضيع... يزيك من تتبيع..

احفر في الواد ثنية و اركز عرصتك في ڨلب الجبال..

و أخطاك منهم ما تمنهم...

ما تبعهم.. ما تسمعهم..

لا تحبهم لا تليعهم...

أهرب.. طير.. جنح..

حل جناحك لسابع سماء...

ارمي عروڨك في سابع وطا..

فيع دمك ورد سواڨي..

غوص في تراب.. في سحاب.. في الماء.. في الهواء.. في نار..في اليل.. في نهار.. في النجوم.. في الغيوم.. في الشجر.. في الحجر.. في البر.. في البحر...

كون مع الكون..

ارشڨ خطاويك و امشي صحيحة...

لا يهمك في الشرف ولا في  الفضيحة...

احلم.. و افرش للدنيا ثنية كلها خبابل مثنية...

منها المحبة مغلفة ببرشا كلام.. و عبي صندوق الأحلام..

الضحكة الرنانة..العين المزيانة.. برشا بلادة و كدس فيانة...

سيب اك العسول و الكلام المعسول..

و كثر في دوزة الدلول...

انساهم ربي معاهم...

امشي ما تتلفتش... سكر وذنيك اهرب عليهم...

أجري ...لين يهزك الريح....

امشي عالسحاب.. و اغطس في السماء..

و اتعطر بالنداء..

اتنفس لمحبة و أخطاك مالهواء ...

يا شميسة مخبية... يا حكاية منسية...

يا شهوة صبية...