خاتر عندي روح .. نجم نعيشك بيها .. نجم نمدك بدقات قلب من عندي و نفس مني .. خاتر عندي قلب .. نبض ليك مني .. و نبض يذوقك فني .. و في سكاتك متغني .. شبي زينها ولى فني .. في غصرة روح خلالي قلبي متغني ..

و نسكت تاتة و نوصي الزغراطة على زينها غنو و قولو يا حواتة .. تقمصت القلم و بديت نخطلك و في لحظة نبطلك و من بعد نثور و ندور و نضيع في زينك بين بحور و برور .. نقول المقصود كلمة و لا نزيد نسطرك بالحلمة .. قال فلان الفلاني الحب كواني و هملني بين الثواني .. ثنية خدك و لا في زين عينك و قدك .. نحب نعيشها هي وحدها ..

تي خلي الحلمة تفددها و تحكيلها عليا كيفاش عامل مغناني و نمول في الأغاني و تولي تعيطلي بالصوت الواحد فناني .. قالو فنان .. تي لاش تسكرو في البيبان و أنا إلي خلقت الفن من تلفيتة ليها و اش دخلي في اماليها .. عينيها .. شبيهم .. دخلوني لبرور موشني موالف ندخل ليهم .. نحب نضيع بين البين و نقيد على صوت ضحكتها بوصلة قلبي و ما نوالف تعبي حتى لو كان كعبي خذلني و تسممت بزينها .. تي اش علينا في جنانها و ما نجمتش نتلفت من ريحة الكحل بين جفانها .. جيت بش نحبس و نكبش بش نرجع و لروحي نردع .. ياخي طلعت نبدع و مضيع ..

زعما تكفيها روحي لبنينة و لا زينها ما يكفوشي مال الدنيا و بنينها .. سكتت مرة و قلت نسألك كيفاش جيتني و لعندك لزيتني .. كيفاش قلمي راض بعد ما هاج و ماج و ولى يخط في لوعة شوقها و يعملي ماكش موالف خليني نقتل عصافر الحب الحلالف و من دمهم نعمل حبر و نعمر الورقة سطر سطر حتى لين نلقى كلمة تعني البحر و البحر في روحها هايج مايج موش من عوايدو .. و بعد أول ما قلت عندي روح ياخي قلمي وحدو قالي خليني أنا نبوح و في زينها توا نروح و من ريحة الكحل توا كل شيء يفوح و قلمي يكتبها و أفكاري المحرقصة في كنينها ترقص و ما فهمتهاش لوين بش تهزني و فاش تفركس .. نحب نزيد نكتبلها و حروفي تبعثرت و تعثرت .. موش فاهم كوعي من بوعي و لا الحروف اش بش يخرجها من ضلوعي ..