نحب نراك .. اليوم و لا غدوة و لا بعدو

مش مهم .. المهم نراك و العين تجي في العين ..

تدور و تعمل روحك ماريتنيش أما بعد ترجع ..

تمدلي يدك .. نمدلك يدي ..

" تهمسلي في وذني و تقلي " القبلة سلام في حد ذاتها

و تبوسني من خدي و تلعبلي بشعري و تقلي توحشتك ..

نقلك أنا زاده أما القلب مالداخل معبي بالكلام

فرحة و ضحكة و شوق و عتاب و ملام ..

نحب نراك في جنينة

في الربيع و الطقس زاهي

و ريحة الياسمينة فاوحة من دار الجيران

نستنا درج و نزيد درجين .. نكلمك نلقا تاليفونك مسكر .. شكرا لاستخدامكم شبكة تونيزيانا لا يمكل الاتصال برقم مخاطبكم في الوقت الحالي .. تن تن .. تن تن ...

نزيد نستنا شويا آخر و كي مانلقا بيها وين نخرج .. نمشي في الكياس ..

نسمع صوتك تعيطلي .. ناقف و تجيني .. تقلي سامحني وخرت عليك .. سامحني البرتابل طايح شارج ماك تعرفو خرده كيف صاحبو .. تييه شبيني نحكي هكا ؟ سامحني و كاهو .. نغزرلك لعينيك .. نضحكلك و نقلك سامحتك شنعمل لعمري نحبك .. نحبك .. نحبك .. و مالقيتش كلمة أخرى نملى بيها النص .. المفيد تبدا خارجة مالقلب و كاهو ..

نحب نراك في رحلة

تجي العين في العين على غفلة

تدخل للكار و تلقا آخر بلاصة فارغة حذايا .. خاترني ديما وحدي ..

تقلي سامحني نجم نقعد حذاك ؟

أووه حسيت روحي في عصر الثمانينات .. سامحني و تفضل .. مانحملش روحي كي نبدا نحكي هكا .. أما الله غالب ديما نقول الكلام هذا .. تي المفيد اللباقة ديما باهية كيما يقولو ..

نقراو مع بعضنا كتبات و نسمعو غنا ..

نحوسو و نشيخو .. ندخلو لبعيد و ين الخضرة و الما ..

و نبعدو عالمرض و الدوا ..

و نرتاحو تحت الشمس و السما ..

تقلي نحبك .. نقلك حتى أنا ..

اي .. تي علاش الكذب و الترهدين ..

تحبني و نحبك و مع بعضنا فرحانين ..

راضيين ساهرين مصبحين ..

شايخين و عاملين جو .. شكون كيفنا ؟

نحب نراك في حفلة .. تبدا تاخو و تعطي مع الناس و أنا نغزلك بالسرقة .. شلقت بيا ؟ اي شنوا أكثر من هكا ؟ ما نغزروش ؟

اي مانجمش منغزرلكش .. نستلبس .. و نتفرعس على خاتر نحب نراك ..

نحب نراك في خيالي

تجيبلي النوار في الصباح

أحمر و أبيض و روز .. هاذوما الألوان اللي نحبهم  

النوار حبيتو خاتر في خيالي ريتك تحبو ..

نحب أصابك عشق رغملي على أول ماسمعتها ما حسيت بشي .. كيما رسائل غسان كنفاني لغادة السمان ..

نقراهم و القهوة توفا و مانحس بشي .. متبلدة المشاعر ؟ يمكن .. أما توا نحسهم ..

قلبي يدق و عيني تلمع كي نسمع عليك خبر ..

و يهون على خاترك الدم و الهم و الحجر ..

نحب نراك في كل و قت و كل بلاصة ..

نحب نراك ..

فديت

تخنقت

الحيوط حفظتني

و البيوت كرهتني

و كل ليلة نقول نحب نراك

يطلع النهار و مانراكش

ونتذكر وين ريتك قبل

و يطيح الليل و نحب نراك !