Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

ناسي وجيعتي

nostalgie-confusion-slamNabil Dabbous - نَبِيلْ دَبُّوسْ

من كلمة في غناية بديت..

زعما النار تطفاشي و نبرا ..

عييت من كثر ما عفست عالجمرة ..

يا ڨلب فكرتش بضيڨ عروڨك ..

تخافش يزيد الضغط و يفجرها ..

و مانيش خايف من المرض يعوقك ..

الخوف توفى و الحروف تعيد خبرها ..

نخاف كان ندخل ڨبري ..

لا تعيش حروفي و لا تلڨى خبري ..

و خليك صابر ما تسيّل حبري ..

ظل القلم يضبح ليلي و نهاري ..

و يبدا الورق شاهد علي في كبري ..

يحيّر الأوجاع و يكثرها ..

و يحير على وجاعي المتراكمة ..

و يخط حروف متصادمة ..

و موش عارفها روحي علاش قادمة ..

عملت من حروفي لڨلبي ضميدة ..

و حروفي ماهيش موالفة بعضها من مديدة ..

جوفي من داخل جف ..

و الزمان تبدل ماعادش يتعرف ..

جوفي كلاتو جمرة من نارها ولى شاحب ..

في كنيني نار كلات العروڨ ..

و النار للماء ما تصاحب ..

ڨلبي وڨف ما نبض فيه شريان ..

تي حس و أنطق عليك الأمان ..

ما يتفكرني كان في سواد الليل ..

يتفكرني بنبض بالحس و يذوڨني الويل ..

ياما عرفنا ناس و عاشرناهم ..

نسانا الزمان و نساهم ..

نحكي عاللي حسبتهم مشكايا و كنت مشكاهم ..

و إلا إلي وقت شدتي بدلو ثناياهم ..

ڨلت الزمان خوان ..

و الزمان يتعدا و ما ليهم كان سيدهم النسيان ..

جرحك بالصبر داويه ..

و الڨلب بالمحبة عبيه ..

و الماضي مشى على روحو وقيت بش تتعدا و ترميه ..

ڨلبي حاير و دايخ و هايم ..

سهران لا يخلني نرڨد النوم الدايم ..

ڨلبي حاير و دايخ و فاني ..

و كثرت محاني ..

ساهر و منام الليالي ما جاني ..

يا ڨلبي اصبر على الوجيعة عاني ..

ڨلبي عنيد موش طايق الهزايم ..

تي هاني كيفك على الوجيعة صايم ..

و للوجيعة رايم ..

تي ما فما شيء دايم ..

علاش هالخنار كل ليلة ..

و نفس المعبوكة يڨولها يا ويل العاشڨ و يا طول ليلا ..

هذا كلام في سكاتك ..

في خاطر إلي حبيتها و كرهاتك ..

و إلي جرحه ما يبراش ؟

و إلي نوى غير حبها ما يراش ؟

كرهتها و في حق روحي كنت غشاش ..

تي ترص و يزي بلا حس ..

لوني و لون سماء الليل فرد نص ..

نوصيك لو كنت فهّام ..

مادام أنا ڨبلك غرڨت في بحر الأوهام ..

حب روحك و غير روحك ما تحب و بيناتنا الأيام ..

ڨالولي الكلمة الوجّاعة نفّاعة ..

فهمت إنو الواحد على ڨد ما يعيش يتعلم ..

و حقي بش إني نعيش فيه مانيش مسلّم ..

نبات على غيض و لا نصبح على ندم ..

شنيا عمري بش نهز في ڨلبي كل هم ..

النسيان مرادي و مرادهم ..

مالا خليني نعيش و آش يهم ..

نعيش ناسي وجيعتي و ديما نتبسم ..

نبيل دبوس
ناسي وجيعتي
Tags:

Vous pouvez lire aussi