هو تدفن تحت الساقين، بالأكحل كفنوه وبالسبان شيعوه.. لاهو كافر كيما يقولوا ولا مجرم قتال أرواح.. لاهو شيطان ولاهو غول..

هو تولد في السرقة.. وكي بكى غموه في لحظة.. وبسنيهم قصولوا حبلو..

إلي بينها وبين في لحظة وفى.. ولدت بش تقتلوا.. هي أصلا جابت في غلطة وكي خافت منهم رمات بش تتخلص من الورطة..

صاحبها فهم اللعبة شاخ ورمى وراه الورقة.. هذيكة الكارطة كل نهار جوكار جديد.. وهذوكم الرجال ما فيهومش آمان..

هو زادة تولد راجل ينجم يكون يشبه لبوه، مخلوهوش يعرف.. يتفكر روحو بكى ويدها على فمو.. غزر لميمتو ضحكتلو وغطاتو بالمخدة.. مفهمش علاه وجعتو..

هو تولد ملايكة أما مجتمعنا ردوه شيطان..

هو تولد عندوا جوانح قصوهملو وبالشوك بدلوهملو..

في بالو بش يلقى بوه بحثاه وأم مترقد كان في هناه.. لقا روحو في بيت ظلام وما فيها حتى كلام.. لقا روحو بين المخدة والقاع إلي تحتو..

هذا شيتفكر.. وهذا شحب يسأل ربي أنا شنوة ذنبي؟

ذنبك يا ولدي في بلاد عربية تولدت.. وفي بلاد مسلمة تخلقت..

ذنبك، بوك هرب من أمك الي معاتش صبية بش ياخو وحدا ڤورية قاتلوا شمعناها عذرية!

ذنبك، أمك خافت من بوها أكثر من خوفها من مولاها..

ذنبك، عيلة تخاف من كلمة ولد حرام أكثر من كلمة سفاح..

ذنبك، جيران متستعرفش بالصداق تعرف كان عرس وعشاء..

ذنبك، مجتمع ميعرف من الدين كان العذرية ونسى الإنسانية..

بقلم سيرين شيخ روحه