أني منسيتكش و نكذب كيف نقول نسيتك مزلت نتفكرك ،نتفكر نسمة هواك و غزرتك ،مزلت نمشي في زناقيك و نتبع في خطوايك مزال اسمك يرهوجني يخليني نسافر بلاد و مدن و عالدنيا يبعدني مزلت نشم ريحك و مزالت تهبط دمعة كيف نتفكر حديثك ،مزلت نحب البحر و قهوة العادة و تعنيقتك ليا على غرادة  مزلت نسمع غناياتك ندندن فيهم ليل نهار و مزلت ساجد في بيتك و مزلت نتوضى بكلمة حبيتك مزلت تفرحني الكلمة منك و نحيا بغرامك و فنك مزلت انت ساسي و مزال هالقلب راكع في محرابك

مزلت انت الدنيا و مزلت انت الموت مزلت انت الوردة و مزلت انت الشوك مزلت انت بلادي و مزلت انت الحاضر و الماضي خاطر منسيتكش و نكذب كان نقول نسيتك الي كيفك ميتنساش يتحط وشمة يقعد نغرة و همسة يقعد نبرة نار تحرق و رماد في العينين يتسرسب و نكذب كان نقول نسيتك مزلت نتفكرك و نتفكر حديثك أحلامك الي نساتك و دنيتك الي غلباتك نتفكر صوتك العالي و ليالي الشيخ و الكاس  كيف تحكيلي على الثورة و الاستقلال و نختمها أني بضحكة و نقلك يزينا من هالهدرة و ايجا نحكيلك عليا و نترمى عندك و نقلك انت الي ليا و انت الي بيك باش نبدى الثنية و نبات الليلة نغزرلك كايني نحفظ في ملامحك نخاف لا الدنيا تنسيني فيك و تحطني في حياة خلافك و برة يا زمان و ايجا يا زمان و فرقتنا الأيام أما مزلت نتفكرك مزال وجهك مرسوم في حيوط دنيتي و كلامك مغروس في جنينة حلمتي و مزلت ليك و مزال هالقلب يستنى فيك و مزلت نحبك ..