الي اتعس من الشيطان هوما الي قتلوك.. السياسيين...

الخبر وصل في فيفري 2013 وبالتحديد يوم 6 من الشهر، 6 معروف برقم ميلاد الشيطان ونهارتها تحولت تونس لدمار.. أما الدمار المرة هذي ماجابوش شيطان بلعكس جابوه ما أتعس من الشيطان، جابوه السياسيين والكبار.. تحدثوا في الأخبار وقالونا شكري تغدر، وبرصاص الظلم قتلوه، قالونا شكري تخان وريحة الخيانة خنقوه، قالونا بلعيد شهيد ومشى وهز معاه كل عيد.. هو استشهد وقعدوا هوما، هو مشى وقعدوا الأتعس، الأتعس من الشيطان أصحابوا وأعداء.. السياسيين..

قالوا يا صديقي بش نجيبوا حقوا وقرارات مصيرية بش تتخذ، وقالوا يا أخي بش ننصر الحق ولا صوت يعلو فوق صوت، وقالوا يا نم يا رفيقي نم.. والرفيق مشى في الريح وقعدوا هوما هوني يناموا.. رغم اللوغة والقهرة، كنت متفائلة شفت التوانسة يد وحدة وكلهم يحبوا الحق يظهر، وكي نقول توانسة اكيد منحكيش على الي اتعس من الشيطان.. السياسيين..

وقعدنا نستنوا في الحقيقة لكن نهار بعد نهار يخرجولنا وثيقة وما يتحاسب حد، يرمولنا كلمة وميتجرأ حد، حتى الرفاق سكتوا في مجلس الشعب الجديد لاهين.. عندهم الحق الانتخابات اهم والفلوس ترجع الشايب عروس..

كان عندي امل، قلت اكيد بين كومة الخراب تلقى ديما تراب تخرج من الحياة، وبين كومة السياسيين اكيد فمة واحد نزيه رزين.. ياخو طالعوا الكل رزان الحق، من يمينهم ليسارهم، رزان في الحركة ومتحركهم كان السلطة.. والنزاهة متفكرهم كان في اسم انثى تحركلهم كان القطعة السفلى.. وتلموا الكل في الدار الكبرى فوق كراسي خضراء ونسوا صاحبهم الي تقتل بالغدرة، وتلهوا بقانون المصالحة ومجلة الاستثمار الجديدة..

وتلموا الكلهم في مجلس نواب الشعب ونسوا الي النوائب تدور تددر وترجع وقت الغفلة، ووقت الغفلة هوما لاهين بالتصويت على منحة الزيادة.. باركلهم يا شهيد زادوهم في الشهرية ووقالوا بالمنحة بش يدهنولك قبرك كل خماسية، وقت الانتخابات بش يقدموا اضحية.. وقالوا زادة بش يتنقلوا بيهم من محكة لمحكمة، لا مش بش يشوف قضيتك ويحاسبوا الي غدروا، عندهم قضايا اهم متع رجال أعمال بش يعطوهم تمويلات كبرى.. حتى الشعب صدق المسرحية وكلامهم في التلافيز والعياط قدم كل جلسة عامة وصدقوا تمثيلهم قدام كل كاميرا ونشرة اخبارية.. اما الي يعرف الكواليس الحقيقية ينجم كان يتألم ويستنى معجزة حقيقية..

اما حيث ما انت فلنبتسم يا رفيقي شماتة فيهم هوما..

‫#‏شكون_قتل_بلعيد‬