عايشة في دنيا ماهي دنيتي وفي بلاد ماهي بلادي

لا الناس ناسي ولا الكأس كاسي..

عايشة في قفص كبير والي قلت عليهم اماليا وناسي ضيقوه يوم وراء يوم..

عايشة في قفص سماوه بلادي وقالولي لازمك ما تتدفن كان في تراب.. ضحكت في بالي يفدلكوا، تبدلت الوجوه وظهرت الانياب.. وقالولي كل شيء مكتوب في كتاب..

تخنقت، تلونت، تبدلت.. صحت، عيطت، بكيت.. وباقي شيء.. ما حب يتبدل شيء..

قالك عاداتنا وتقاليدنا وهذاكة شوصونا اجدادنا.. قلتلهم مخاخنا وثوراتنا وهذاكة شوصونا ربوبتنا..

قالولي كافرة وبالالهة ساخرة وبالتفكير ضايعة،

حبيت نهرب بعيد بعيد في بلاصة فيها كان انا والحبيب،

قالولي الحبيب واحد وراك عمال بكفرك سارحة..

حبيت نهج نمشي في شارع ما يفهمني فيه حد، ونجم نلبس كيف منحب، ونتدفن ما غير مايراني حد..

قالولي الفيزا والبسبور والكونت في البنكة، وزادة اللغة والدومند واهمهم الجنسية..

في بالي تولدت في ارض ربي الواسعة، نلقاها تقسمت طروف طروف وعينيهم كهو واسعة.. بش يشوفك وين مشيت مع شكون جيت، وقتاه روحت ووين بيت، وكيفه خرجت وشنوة لبست..

قلت ميسالش الارض وقسموها اما ماالنا الا بشر جملية، ضحكوا عليا وقالولي على اما بشر تحكي وشنوة ريق الانسانية؟ فمة حاجتين يا مينا يا منهم، يا احنا يا هوما..

جيت نشوف الاحنا والهوما نلقى احنا هوما وهوما احنا، وحتى الهوما فيهم برشا احنا وهوما، والهوما كيف كيف..

كليت كف وتكيت على الحيط، ودورت السيجارو قبل ما يعاود يطير الكيف..