Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
قصولها جوانحها
Oumayma Oueslati - أميمة الوسلاتيفي النهار الثاني من شهر أيار
تولدت طفلة سماوها إنتصار
فرحوا بولادتها كبار و صغار
إنتصار .... أما ما حست ولا نهار بالفكتوار
في صغرها كانت الدنيا زاهيتلها كي النوار
أما النوّار يجي نهار و يذبال
كيما أوراق الأشجار يجي نهار و تصفار
كي كبرت عيشتها ولات مرّار
و عرفت إلي هي محبوسة في قفص مل بلار
و يداها مكبلة بقيود مل فخّار
ساعات تخمم تجنّح و تهرب مل الدار
ٱما خايفة من بوها سي مختار
إلى تحكمّلها في حياتها و كان ترفض ما يعمللها خنّار
و يضربها و كان يلقى يكويها بالنار
أما هي م الداخل تاكل فيها النّار
و نار هذي كل يوم تكبر و تكبر
حتى و لو شربت بحور الدنيا ما تنجمش ٱطفي هالجّمرة
و كل مرّة تاخذ نفس جديد تتوهج هالنار
لين تولي حريقة ، و هالحريقة ما خلات حتى شي حلو كان ولاّ مرّ ..
تمنّات و ما لقات
عيّات و شكات
تنهدت و بكات
و دموعها جرات
و الحكاية ما وفات .....
سبب هالحريق و هالنّار ، عايلته
اهي عدوّتها ، و هي سبب و جيعتها
بوها كان متعصب و متشدد معاها
وإللي زاد على ما بيها ، أمها
إللي لا وساتها و لا وقفت معاها
و كانت تقوللها كي تتكلم و تحل فمها
" مانرضاش أعليك دنيا و ٱخرة "
" نقّص مالقباحة " ....
عايلتها أقرب ناس ليها ..
فرضوا برشا حاجات أعلاها ..
و هي كانت تستسلم أما خبّات غصتها ..
وجيعتها و ليعتها في داخلها ..
عايلتها أقرب ناس ليها
ٱغتصبولها أحلامها
هدمولها حلماتها
قصولها جوانحها
مكسبها ستيلو و ورقة تهرب باهم من عالمها
تتنفس بين سطور أوراقها ....
بقلم أميمة الوسلاتي
Website Design Brisbane
Tags: