اليوم غلقت ال 25 سنة ، هو منطقيا لازمو يكون نهار مختلف شوية على خاطرو النهار الي خرجت فيه من كرش أمي للدنيا وخذيت فيه أول نفس ، أما غريبة ، ملي غلقت العشرين سنة وفي الخمسة سنين هاذم الي تعداو وليت كل عام يتعدى من عمري نحسو نهار عادي برشا و ساعات نحسو عيد وفاتي موش عيد ميلادي ، كل ما نزيد نكبر عام نحسو عام مالاعوام الي ضاعو عليا ونحس روحي ما قعدليش برشا وقت في الدنيا ولازمني نحلم ونحقق و نعيش مادام مزال في يديا شوية وقت ،لازمني نستغلو ، حاسيلو ما عليناش ، فما حاجة أخرى شدتلي انتباهي زادة ، قبل عمر العشرين سنة كانت سمايا معبية بالنجوم ومع كل عام يتعدى وعام جديد نجي نحسب نجومي نلقاهم ناقصين ، كل عام نربح حاجة و نخسر حاجات،ومع كل حاجة نخسرها نتعلم حاجات ،

في الخمسة وعشرين سنة الي فاتو تعلمت الي الدنيا قصيرة...أقصر ملي نتصورو والي  أحنا في الدنيا هاذي زوار وحتى حد فينا ماهو ضامن عمرو على هذاكا كلمة العيب أذا خرجت ماعادش ترجع ، والي الناس تمشي وتخليك بطول المدة على خاطر انت موش مصدر شروق الشمس وموش محور الكون وماكش آخر انسان على الكرة الأرضية وعمرك ما باش تكون لا انتي ولا غيرك وهوما كيف كيف ينطبق عليهم نفس الكلام هذا حرفيا ، وحتى الي ما يمشيش وحدو يجي نهار و تحضر ساعتو وتفكو الدنيا منا ، تعلمت زادة الي كان موش الفايسبوك عامل علينا مزية وكل عام يفكر ناسي بالنهار الي جيت فيه للدنيا حتى حد ما كان باش يتفكر غير أمي وبابا ، تي هوما الوالدين وساعات ينساو وعلى هذاكا حتى كي الناس تنسى نهار عيد ميلادي ماعادش ننغر وماعادش تقلقني الحكاية بالكل ، تعلمت زادة الي الأصحاب بلي باش اتطول مدة الصحبة بينك وبينهم بطول المدة باش ينساوك ، فيهم الي يخرج من حياتك بكيفو وفيهم الي انتي تعطيه ورقة حمرة وتخرجو من حياتك بالكف وفيهم الي تبلعهم الدنيا ومشاغلها وتنسيهم فيك ،تعلمت زادة الي العز بعد الوالدين حرام والي الوالدين خط أحمر وساعات يلكعو حتى كيف يبداو غالطين ، أما بلي يكون الوالدين يا جماعة حتى كي تبدا انتي مافيك ما يتشاف وما يتمس ما يخليوهاش بيك على خاطر الكبدة بلي باش تكون مشومة عمرها ما تهون على مولاها وحتى كي الناس تلوحك والديك يستحفضو عليك بشومك ولومك وعمرهم ما يلوحوك، تعلمت زادة الي مع كل نهار جديد فما أمل جديد والي الانسان كي يخمم بإيجابية الحاجات الباهية الكل تجي قدام ساقيه أما لازم يعرف كيفاش يلقفهم ويعطي كار لكل فرصة فيهم خاطر الفرصة اذا ضاعت صحيح تنجم تتعوض اما مستحيل تتعاود نفسها كيما جات اول مرة وضيعناها ولازم زادة تعرف كيفاش تختار الفرص الي يساعدوك كي يجيو قدامك ،

تعلمت الي كل حاجة خايبة تصيرلنا وراها سبب باهي على خاطر ربي سبحانو يعرف شيعمل وساعات الابتلاء وسوء الحظ يكون من حسن حظنا ويمنعنا من مصايب كانت باش تصير ومن ناس خايبين كانو باش يدخلو لحياتنا يفسدوها ويشوهو كل حاجة مزيانة فيها ،وكل شي في الدنيا مقدر ومكتوب وأحنا هكا والا هكا مسيرين للثنية والأقدار متاعنا وماناش مخيرين أما هاذي دنيا ولازم تتعاش ولازم نطيحو ونقومو باش نكبرو ونتعلمو نفرقو بين الصحيح والغالط ونتعلمو نختارو ناسنا ونحددو اختياراتنا في كل شي منغير استثناء même نوع اال parfum الي نستعملوها ،ممكن تجيكم الفكرة غريبة شوية اما قدرتك على اختيارك لل parfum متاعك الي باش يقعد يتبع فبك حياتك الكل هي أول خطوة في تسطير حياتك وصقل شخصيتك ونقطة اختلافك على بقية الناس  ، تعلمت زادة الي العمر مجرد رقم والي أحنا انجمو نخزرولو مالزاوية الي نحبو نخزرولو منها على خاطر كي يبدى القلب jeune والمخ jeune وطيب عمرو الانسان ما يكبر ويشيب ، تعلمت في عوض الفرصة نعطي عشرة باش كي نقطع حبل الفرص نقطعو عن اقتناع وما نندمش ويكون ضميري مرتاح ،تعلمت نعطي بلي نقدر من محبتي للناس على خاطر المحبة بلاش فلوس والدنيا خيابت وكان موش شوية المحبة الي ناخذو فيها من عند والدينا وكعبتين وكعبة أخرين راهي الدنيا اسوادت وحبست خاطر أحنا كإنسان نعيشو بالمحبة والمشاعر كلمة اتطلعنا لسابع سماء وكلمة تدفننا في سابع أرض ، تعلمت نسيطر على لساني ونعرف وقتاش نتكلم ووقتاش نسكت على خاطر ساعات السكات حكمة ، تعلمت وتعلمت وتعلمت ،وفي كل مرة في نفس النهار هذا من كل عام يتعدا قدام عينيا شريط حياتي ونتفكر الحاجات الي تعلمتهم حتى أبسطهم ، ونتخيل أول حلت عين في الدنيا وأول خطوة مشيتها ونقعد نسأل في روحي زعمة كيفاش كبرت ووقتاش كبرت ، قظاش الوقت يجري ،أول بكية وأول فرحة ،أول غصرة وأول تفرهيدة ،نتفكر قداش من مرة طحت على ركايبي لين جرّيت الدم وأيست أما في لحظة تصالح مع روحي قمت منها صحيحة وقداش من مرة نجحت وقداش من مرة فرحت وفرّحت وساعات يجي على بالي برشا وجوه فيهم الي نتفكرها وفيهم الي نسيتها وفيهم المدغدش وساعات أصوات ماهمش غراب عليا أما نسيت أصوات شكون وساعات يجيو على بالي برشا وجوه flou ، نتفكر أول بيسكلات وبهيمي الأزرق حاشاكم ههه  ودبادبي وحملة بابا ودلال أمي وكل ضحكة مالقلب ضحكتها مع خواتي وكل دقيقة عشتها مع عايلتي وأصحابي .. هذا juste الشوية الي تفكرتهم ومالحاجات الي تعلمتهم في 25 سنة ،حاسيلو ما نطولش عليكم، عيشكم الناس الي تفكرتوني الكل وعيد ميلاد سعيد يا أنا .