المخ تحرق من كثر التخمام كيفو كيف امبوبة بيتي اللي في كل مرة تتحرق و تخليني في ضلام..

العقل سارح و الفكر شريد و العينين في سقف مرشوقين لا ترا فيهم دموع ولا هما فرحانين...

الفم ساكت و القلب يحكي والروح تنين..

لاعرفت نقدم ولا عرفت نرجع خطوتين.. احلامي في سما معلقين بدموع العين مغلفين ...

الكلام في الحلق عامل غصّة و التنهيدة عليها لا منّ وصى...

محصورة بين اربع حيوط و البيبان ليل نهار مسكرين حالفين عليا مع زهري اللي عاطيني بالقفا قول قتلتوا قتيل ....

روحي محصورة في هالبدن التاعب لا حركة لا بركة غارقة في فرشي قول في بير .. محبوسة من ورا عينين محوقين في همهم غارقين هما لثنين ..

حاسة روحي كيف طير مقصوص الجنحين قاعد يتخبط في همو  سنين، ماعاد فاهمة شي ولا عاد عندي قدرة باش نحب و نسامح ولا عاد نجم نتقبل وجيعة جديدة الڨلب طاب و كلّ و ملّ

من مر الزمان تجرع سنين ..

عجزت و وقف بيا اللوقت و خانتني ساقيا و قعدت علي بلاصتي ندور في حلقة فارغة في اللاشئ...

نغزر لحياتي كيفاش تعدات من غير ما نجمت نعمل شي ...

خدعني زمان وجعني لا نجمت بيه نصيح ولا صبر عليه طاوعني علي ڨد ما نوڨف نطيح وعلي ڨد من لحزان نهرب بالغصب يرجعني .