ساعات تتبختر كيف الطاوس العين في السما والتبسيمة متركنة ، وساعات كي العصفور الي حاسس بجناحاتو أما ناسي كيفاش يطير ، كيف الشتاء الي تقطر بالنكتة بالنكتة في قلب الصيف ، والدمعة الي اتطيح عالأكتاف تسكسك مالفرحة موش مالوجيعة ، كل شيء فيك غريب ومعكوس ، كيف الحلمة الي ما تتشدش باليدين اما بينك وبين روحك تعرف الي هي حقيقة وعمرها ما كانت حلمة حتى كان ما نجمتش في نهار لاتمسها ولاتحسها .

كيما الضحكة البنينة عالخد المليان في قلب التكربيصة في الأرض وركبتك تشرشر بالدم، وكيما كلمة توحشتك على غفلة في قلب السكات . كيما كلمة نحبك في وسط عركة مابين زوز يحبو بعضهم وتعنيقة حنينة يوفا بيها برشا صياح ودموع ،  انتي أحلى من برشا ضواد متناسقة في الدنيا وموش كل شي فيك يتشاف بالعين .

حتى كيف نعطيك بظهري روحي تشوفك متعدي تتبختر دبة دبة وتسمع خطوة ساقيك الي ترزن كل ما تقربلي ما تحبش تمشي وفي لحظة تزرب تهرب وتخليني واقفة وراها على بلاصتي كالحجرة نستنا ترجع وتعنقني . انتي كيما أول حاجة من كل حاجة ، الخزرة الأولى الي تترسم في العين  والضحكة الأولى الي يقعد صوتها يرن  في الوذن سنين و سنين ، والكلمة الأولى الي تتحفر في القلب وتقعد عايشة معاك لآخر نفس . مشا في بالك كي عطيت بظهري ما شفتكش، ممكن عيني غفلت أما قلبي عمرو ما يغفل عليك، يشوفك حتى في غيابك كي تعمي عيني ويطلعك من وسط ألف .

قداش الدنيا فارغة منغيرك  ، باردة وماسطة لاسطة ، كل طريق وكل تركينة تفكرني بيك تشعل فيا نار ما تطفاش وتزيد تحيرلي وحشتي ، وقتاش تجي ونحط عيني في عينك وتقرا من عينيا كلام ما تقالش وعمرو ما باش يتقال؟ وقتاش تجي وتفيق روحي الي تشلّت من نهار الي ضيّعت خطواتي لعينيك وهربت عليا الثنية أيام ، وقتاش نشوفك ونعنق وجهك بعينيا من بعيد ونعنق صوتك سوايع وتطفى النار اللاهبة الي في قلبي شوية  ، توحشتك وتوحشت كل حاجة باردة وماسطة فيك يا ماصط .توحشت خزرتك الي عمري ما فهتها على قد ما حبيتها ، ولهجتك كي تدكك عليا وتقلد كلماتي ،تضحكني في تمبك حشمتي وما نلقا ما نقول ، ماعادش نعرف نتنرفز والا نضحك، نهرب نجري مالفرحة كالغشيرة رغملي كي تاقف قدامي ساقايا تحبس ماعادش تحب تتحرك وعينيا تشبّر فيك اتلفني وماعادش اتطاوعني ونسرح لحظتها وأنا واقفة مقابلتك ونتمنى كان جيت انجم نعنقك وندخل في لحمك ماعادش نخرج .