Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
استناني
Ghada Tawes - غادة طاوساسنتاني
حتى كان بدات تشتي
و الريح هازز وراق الشجر
و حتى كان الغشاشر الصغار تبكي
و مهما زاد المطر ...
امشي من بنزرت لباب بحر
و كان ڨرست خوذ قهوة
مش مهم حلوة برشا ولا ناقصة سكر
المهم زايدة تنوة
أغزر للي ماشي و للي جاي
للراجل اللي لاهي يصب في التاي
اللي راقد على حيط بار
لمرا تقول لولدها يزي بلا أسئلة متاع كبار
للي دايخ و ماهو فاهم ليل من نهار
فديت ؟
سيب المنقالة ...
ماتلوجش عالوقت ..
ماتسئلش اليوم سبت ولا أحد
الأيام الكل كيف كيف
الفرق بيناتهم
الطقس خريف ولا صيف
زيد استناني
حتى كان تملات البلاد
و كثر حس و نقلقيل العباد
و مهما زاد التشقنيس
و حملات التفتيش
و حتى كان سوادت البلاد بالشرعي و البوليس
و احمارت و زراقت بالحملات الانتخابية
و الأصوات المشرية
حتى كان فاحت ريحة البص و نقص الأكسيجين
صيح راني تخنقت و تغفصت
منا وجيعة الواقع و منا وجيعة الأحلام ...
استناني شويا ..
هاني في الثنية ..
نجيك و نهربوا لبعيد
نتدفاو بنار الحطب
نشطحوا على مقطوعة سمفونية نسميوها " الحب "
نضجكوا و قلوبنا تبكي
على ماضينا اللي تملا بالهم و البلا
على حاضرنا اللي يسئل فينا ماضينا وين مشا ؟
على مستقبلنا اللي قاللنا ابعدوني و سكر عليكم باب البلا ..
الوقت وقف ..
المطر كف ..
هاني وصلت .. وخرت عليك ؟
ميسالش .. هيا نهربوا ...
بقلم غادة طاوس
Website Design Brisbane
Tags: