Zaineb S. - زينب س الجزء السابق

ما صدقتش اللي شافتو عينيا استدعاء عرس سيف و الهام ، هزيت عينيا شنوة هذا ..

هذيكا عزيزتي انفيتاسيون جابهالي سيف لعرسو شهرين اخرين جاني يتمسكن يحب يكمل يخدم معايا قلي اللي هو جا يسأل عليا و انتي رميت عليه روحك ..نسمع حاسة روحي بش اندوخ ..

شوف عيش بنتي الدنيا هذي راي معبيه بالذيوبة ، انا على خاطر الما و الملح اللي بيناتنا و العشرة ما حبيتش تقعد مغشوشة انا مرا متعدي على راسي البرشا و الشوية برا ربي يوجهك خير ..خرجت دايخة هذا سيف اللي وثقت فيه و عطيتو كل شي ..يا ربي ، وصلت لدار ..

كلمتو تستنا فيه وقتاش يجي ..جا اطرشقت عليه يا ساقط يللي ما تحشمش عرسك شهرين اخرين و تقولي استنا عليا بش ناخذك ..شبيك فاش تحكي ..فاش نحكي باقي مازال عندك عين و تكذب متجيش راجل انا اللي عطيتك كل شي عطيتك اغلى حاجة عندي ..

يزي عاد و انتي نهار الكل تبكي و تغرد لاعبتلي فيها دور الضحية ما صار شي بالسيف عليك كل شي بكيفك و برضاك..امان مش انت درت بيا و فهمتني اللي انت تحبني و بش انعرسو ..

هههه نعرسو مهبولة انتي شبيك بش ناخو بونيشة تعرف مرتي شنوة مرتي مهندسة بنت عايلة كبيرة برسمي انتي تخمم هكا و اسمع عرسي شهرين اخرين منحبش المشاكل و الصغير اللي في كرشك طيحو ولا برا لوجلو على بو اصلا انا وين نعرف عليك رقدت مع شكون بعدي...

قلي لكلام هذاكا و خرج ، تصدمت لميت دبشي و هزيت لفلوس اللي عندي و خرجت هايمة فالشارع ، يا ربي وين بش نمشي ، تذكرت سي نورالدين قلي كيف تستحق حاجة كلمني ، كلمتو فرح بيا يلقاني نبكي قلي ايجاني لدار ..

مشيتلو سمعني حكيتلو كل شي قلي الليلة بات هنا و بعد ربي يعمل دليل ، من غدوة هزني لطبيب عدا عليا و قلي لازم اطيح في اقرب وقت ماكانش كان تزيد توخر يولي خطر على صحتك و هذاكا اللي صار ، طيحت صغيري كبدي حسيت نهارتها قطعة مني تقصت حسيت روحي تنحات مني .. سي نورالدين كان واضح معايا انا عجبتو برشا اما مينجمش ياخوني قدام الناس الكل بالاخص ولادو تنجم تصير برشا مشاكل و قلي نعرف اللي لو كان جيت في وضعيات اخرى مستحيل ناخو راجل اكبر مني ب 30 سنة ، انا وافقت بش ناخو راجل اكبر مني قد بابا و هو وافق بش يسترني ، كان عرس مصلحة كل واحد فينا يلوج على مصلحتو ، بعد شهرين سيف عرس و انا خذيت نورالدين ، خذالي ابارتمون بعيد عالعينين و لاهي بيا في كل شي و بدا يحركلي في امور لغناء .. ....