Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

ارتيستا #11

zaineb-roman-derja-artista-tunisieZaineb S. - زينب س

الجزء السابق

قعدت ليلة كاملة انغزل لين هزني النوم رقدت ، صباح قمت على صوت تدوير مفتاح فالباب قمت مفجوعة شكون شكون ، دخل سيف ..شبيك
انا ..بففف هذي صباح الخير متاعك ..صباح النور ..جايب ساشيات في يدو معبين بالقضية ، خو هاو قضية شوف ريقل امورط و قلي شنوة ناقص تو انكملو ..يعطيك الصحة ، هزيتهم و مشيت للكوجينة ، جاء من ورايا و حملني ، بعدت عليه ..شبيك شنوة تتعزز.. مانيش نتعزز.. اممم مالة توحشتني كيفما توحشتك ..

عاود قربلي قلي انا ماذبيا انكملو اللي بديناه البارح ..طبس بش يبوسني بعدت عليه و دورت وجهي ..سيف يعيشك مانيش قد بعضي ..شبيك خديجة شنوة مشكلتك شبيك تتهرب مني هذا الكل على خاطر زبيدة..لا على خاطر روحي لوقتاش بش نقعدو هكا ماعادش نحب تمسني كان فالحلال ..شنوة..اي مش هذا كلامك انتي مرتي و منسلمش فيك ولا بدلت رايك .. خديجة لمور هذي ما تجيش هكا بزربة كان انتي ما عندك شكون يسأل عليك انا عندي عايلتي ..شنوة امان سيف نحكيلك تولي تعاير فيا ..

لا سامحني مانقصدش اما انتي زادة متكونش انانية و افهمني مش وقتو لازمني شوية وقت ..خوذ وقتك اما هذا اخر كلام عندي ما تمسني كان فالحلال اللي صار بيناتنا غلطة و لازم تتصلح ..نفخ عليا نطر قدامو الكرسي طيحو و خرج جبد الباب وراه بالقوي .... اكهو لازم لمور تتصلح مانيش بنت شارع بش يقعد عايش معايا فالحرام ، حطيت فطرت و درت نغسل فالماعون حسيت خواطري دارت تقلقت مشيت نجري لبيت البانو و رجعت اللي كليتو لكل ، اكيد الكرواسون قلقني ولا حليب فاسد ، معطيتش للحكاية اهمية ،

درت انلم حبيت انضم الماتريال حسيت بشوية دوخة مانيش قد بعضي يضهرلي مللي صار معايا لبارح ..تعداو 3 ايام سيف ريحتو ماثماش و مسكر التلفون متاعو ، جاب ربي عندي شوية فلوس قاعدة نصرف بيهم على روحي ، كل يوم الفشلة تزيد بيا عندي روتار في الريقل اما قلت نورمال بالك ستراس..نهار الرابع جاني سيف ..انا : حمدلله عليك كيف تفكرتني ..سيف: انتي اللي حبيت هكا ..شنوة اللي حبيتو فهمني قوتلك ما تمسنيش فالحرام .. باهي مش بش انعاودو نفس لحكاية مش وقتو حضر روحك بش نخرجو ..

وين ماشين سي نورالدين يحب يقابلك ..علاش.. وين نعرف عليه ..مشينا المرة هذي لدارو دار فيلا كبيرة ..سيف زعمة مرتو متقول شي ..متقول شي خاطرها ميتة .. اووه ربي يرحمها مالة عايش وحدو .. اي عندو زوز ولاد معرسين ..وصلنا فرح بينا و كان معاه راجل اخر سلمنا عليهم و قعدنا .. مرحبا خديجة هذا سي علي شاعر نحبو يسمع صوتك معايا ..سمعتو صوتي عجبو هو زادة عجبو برشا ، اكهو كملنا و قلي سي نورالدين استنى مني تلفون ، قص عليه سيف :لا سي نورالدين كان ثمة حاجة كلمني انا هي ما تفهمش فالامور هذي ..قحرتلو و مشيت سبقتو للكرهبة ..خلط عليا طلع : شبيك عملت هكاكا ..امان سيف ما ريتش نورالدين هذا كيفاش يغزرلي انا والله خايفة منو ياسر بزناس ..بربي يزي يزي الراجل عينيه معبية كان يحرك صبعو بركا يجيو الف كيفك ..بلعت السكينة بدمها و سكتت...




زينب س.

ارتيستا #11