ياخي كل خليقة عندها عينين ووذنين وتتكلم هي انسان؟ ياخي كل شكل يمشي على زوز ساقين وياكل بمغرفة هو إنسان؟ ياخي الكلمة ساعلة ياسر ولا الإنسانية رخصت اكثر؟ الكائنات هذي لا حيوانات ولا نباتات ومن المستحيل تكون بشر..

صحيح صدفة جاو يشبهولنا برشا وحتى التمييز قد يصعب أحيانا لكن هذا ما يعطيهومش حق لقب إنسان.. هذي كائنات قلوبها سودة ومخها كلها أفكار شريرة، يحبوا كلن القتل والدمومة، ويعشقوا التفجيرات وشوية الميمة..

هذي كائنات معها تحرم الإنسانية وأي شخص يجبد حقوق الانسان والحريات بش يدافع عليهم يتسمى مشارك في الجريمة..

يزونا من متاجرة بالقضية ومن تشبيه كل كائن يالإنسانية..

يزونا من المثالية إلي ماريناها كان وراء التلافيز والقنوات الوطنية..

الكائنات هذي قتلها هي قمة الإنسانية خاطر حتى هواء بلادنا في رواريهم حرام فيهم.

نعرف بش نتسب برشا من مدوني الحريات ومن أكا الجماعة إلي ضد الإعدام، أما زادة نشوف كائنات كي هذي تاكل في قمح بلادي وراء القضبان وتخدم فيها رجال البلاد وأسيادها منجم كان ننسى العنوان ونحضر معاهدة جديدة تحمي بلادي..

اليوم فجرتوا أولادنا، والبارح ذبحتوهم وقتلتوهم وأغتلتوهم، وأحنا غدوة بش نضحكوا عليكم..

الضحكة إلي تحبوا تاخذوها مناش مناحينها وبش نرودوها واجب دستوري..

اليوم شويتوا أمهاتنا، والبارح بكيتوا نساهم وخواتهم، وغدوة الدور عليكم..

لكن يبقى العيب مش فيكم، العيب في صحافة حتى الحزن بكرامة منعتنا منو، الحزن حق بش بعد كي ناقفوا نكونوا أقوى، لكن مش حزن ذليل ومعاه الغناء الحزين تقول في برنامج المسامح كريم..

إحزن وأشطح، خلي يقولوا هبلت خير ملي يسلبولك كرامتك..

والعيب مش فيكم، العيب فكا الناس الي بحقوقكم منادين وبحق الكرامة للعايلات المتضررة ناسين، ناسين الي من حقهم البكاء لكن مش على الحان حزينة، من حقهم البكاء على انغام صمودية..

العيب مش فيكم في نواب خذاوا الكراسي وتلهوا يلعبوا بيهم وكل واحد يلوج عالمقعد الأول ونسوا الي شعبهم أولى بيهم..

وكل ما يموت واحد يقراو الفاتحة دقيقة وينسوا الشخص ألفين دقيقة.. ويتلموا الوزرة بش يحلوا المشكل يولوا يشوفوا فمشاكل الميزانية..

العيب مش فيكم في رئيس فيبالو الشعب عندو حصانة ربانية وناسي الي رب قلوا اسعى وبعد الباقي عليا..

المفيد متكونش كيفهم هوما لا صحافة بلا كرامة ولا سياسي بلا ضمير ولا رئيس بلا هيبة..

كون انت انسان ومن حقك تحزن وتبكي أما نهارت الي تاقف حتى الإرهاب ميوقفكش.. كون انت الكرامة والانسانية والضحكة..

كون القوة والاستقلالية وحتى الشعلة..

كون حسام وسيف وضحكتك سهم في قلوبهم هوما..

بقلم سيرين شيخ روحه