المهم ان تكتب ان تستسلم الى نوبة القلم

هي الي قالوا عليها اللطف راهي شيوعية

لي يبداو في التراكن يحكيو عليها بالشوية

لي قالوا مسكينة في دار رويجلها مش متهنية

الطفلة الصغيرة لي نافحة بعمرها قالوا الخيت مش متربية

لي سترت بدنها قالوا الهم شهال التخلف و الرجعية

لي عرات زنودها قالوا اللطف شنية الحالة هذية

لي لبست الحجاب قالوا نحي السروال البس جلباب

لي في لحظة اختيار نزعت الخمار

قالو مخيبها علاش النفاق من اول نهار

هي السحارة على خاطر راجلها يحبها

هي الgنgانة على خاطر راجلها هاجرها

هي الزعبانة على خاطر تضحك في الوجوه الكل

هي البهلولة لا تبل لا تعل

هي مgدية بنت دار

الاخرى هملتها عاملة العار

هي المتخلفة على خاطر سلفية

الاخرى ربي يهديها هام قالوا يسارية

هي فاضية شغل من كتاب لكتاب

الاخرى من جمعية لجمعية قال شنية تحارب في الارهاب

هي المرا الي تلهات بيها الاشعار القبانية

لي كرمتها الرسالة المحمدية

هي الدرويشية النرجسية

هي لي تلهاو بيها الهن اكثر من الهم

الي تعاني من الجهل و تخلف العقلية و الهم

هي الانسانة الفلاحة المهندسة الطبيبة البطالة المضاربية الغنية الفقيرة البهلولة السكبانة الخرنانة الفنانة المزيانة الباردة الشلهب العاقلة المجنونة المليانة المسلوتة الرومنسية الثورية

الشاعرية المسالمة المتمردة العزوزة الكهلة الصبية هي و هي و هي زيد اشكرها مش مزية هي

آآآ هي المرا التونسية