Développé par Création site internet freelance
 Sihem Hannachi - سهام الحناشيو انا نلوج وسط وراقي القديمة لقيت جواب...جواب منك ...مكتوب بحروف يدك...وقت اللي كنت ما تمنش بالمسنجر و الميساجات...وقت اللي كنت تقلي محبتنا تخلدها الجوابات...كيف تنساني هوما بيا يفكروك...و كيف عليا قلبك يقسى يحنوك...
كنت تقلي كل جواب نسهر عليه ليلة...و الصباح يتبعثلي مرسول في يدين امينة...كنت تقلي نتمنى حبيتك ايام الستينات...وقت اللي باش نوصلك لازمني نتعب و نشقى و نتعذب في سكات...وقت الافلام القديمة...و النوارة اللي مخبيهالك وسط كتاب و ريحتها البنينة...
 Sihem Hannachi - سهام الحناشيانا مرا تونسية...حرة مڨدية...أنا القارية المتعلمة...انا الطبيبة اللي داوي...المهندسة و المعلمة...انا اللي نخدم الارض..انا اللي توفي بالوعود و تصون العرض...انا اللي نرفع الراس...انا اللي نعلم جيل من غير لا كتاب لا كراس....
انا اختك اللي تصونك في الحضور و الغياب...انا امك اللي كيف تبطى تستناك للفجاري قدام الباب...انا اللي في صغرك خدمت عليك باش نوفرلك الماكلة و اللباس...انا بنتك اللي عايشة باش ترفعلك راسك بين الناس...انا اللي في الشدة تلقاني جنبك...و في الوجيعة دواك و همي من همك...
 Sihem Hannachi - سهام الحناشيلو كان يرجع بيا الوقت لأيامات أكبر همي فيها نرضي في المدرسة معلمتي...و أثقل حمل على ظهري كان كرتابلتي...نرجع لايامات كانت فيها الضحكة مالقلب...لا نعرف معنى وجيعة لا قهرة و تعب...
نرجع بالماضي لدارنا وين ولدت و تربيت...وين العايلة الكبيرة و ريحة الجدة الحنينة اللي على اسمها تسميت....نرجع وين الحومة و صحاب الصغر...ذكريات محفورة في قلبي و عقلي دهر...نرجع وين كنا نلعبو بالسوايع...وقت الصحبة بالرسمي...صاحب شاريك و لمصلحتو بايع...
 Sihem Hannachi - سهام الحناشيتربيت على يد مرا علمتني نصنع مالضعف قوة...عمري ما نسلم ولا نؤيس ولو واقفة على حافة هوة...
نكتم وجيعتي لداخل و حد ما يسمع بيا...لا نشمت فيا عدواني ولا نخلي حبيب يسخف عليا......
علمتني نقدم لقدام...نمشي على قد خطواتي لا نحسد فلان لا نقلد عيشة علان...
ارضى باللي كتب يا بنيتي هكة كانت تقول...اللي في عيشت الغير يطمع ما يربح كان تمهميش العقول...
 Sihem Hannachi - سهام الحناشينتفكر العيد كيما اليوما...روايح البخور تفحفح و دويرتنا نظيفة ملمومة...كانت دارنا دار العيلة...اللي تتلم فيها العمة و الخالة...العزيز و لميمة...ليلة العيد ما فماش نوم للصباح...
جوجمة صغار...اللعب و الصياح...قهاوي و حاجة حلوة...و حكايات نسا و شبعة دوة...في كل تركينة حكاية و ضحكة للفجاري...
وبعد الصلاة نقومو على صويت الحنينة و ريحة الجاوي...نتفكر الحب اللي كنت نراه في عينين الناس و هي تهني في بعضها...
و الرجال و هوما مروحين مالجامع باللبسة العربي و وهرتها...بالبوس و التعنيق نعرضو لبابا و جدي...
|
|
Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 94 Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 100 Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 94 Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 100 Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 94 Warning: Illegal string offset 'active' in /home1/datalyz/public_html/tounsia/templates/tounsia4ever/html/pagination.php on line 100 |
