جاك الحب يا غافل...ياللي كنت ناسي قلبك و عليه مكش سائل...

ياللي ليك سنين مسمعتش دقاتو و حسيتو قريت يخرج يرفرف و يعلي في السما بجناحاتو...

ياللي ليك مديدة على كليمة حلوة...دوليشة في زناقي المدينة اليد في اليد شبعة ضحك و دوة...

ياللي ليك زمان على فيقة على صوت المحبوب...على نغمة و الحان تذوب القلوب...

فليس مع فليس يوليو كديس....اش علينا في اللي لاباس بيه و اللي يفيس...

احنا باش نمشيو في الدنيا خطيوة خطيوة...باش نبداو من الصفر لين من كدس حطب نبديو دويرة....

بعيدة عالمدينة و الجوجمة و الحس...دافية و دفاها من فم الباب يتحس...

باش ناثوها على كيفنا...و نعديو فيها شتانا و صيفنا....

الكلنا نستناو في هاك الانسان اللي باش يتفرج معانا في فيلم و يسمع موزيكتنا...و اللي باش نحكيولو حياتنا و ليه تكبر مع الايام محبتنا...اللي باش يشريلنا كتاب...و يصنع على خاطرنا الفرحة و ينسينا في العذاب...اللي كيف تسمع صوتو تزهى تشيخ...و تعيش معاه صغرك و بقية حياتك لين تكبر و تشيخ...

نستناو في الامير على حصان و الاميرة المزيانة...نستناو في يد دافية و لمسة حنانة....و عيشة كيف قصص الف ليلة و ليلة...لا قلب معذب و لا عقل في حيرة...انسان باش يعلمنا مفاهيم جديدة للعيشة...كيفاش نبيعوها بلفتة و درويشة...كيفاش نعيشو اللحظة...

تعرف روحك كبرت مع اول شهرية تاخوها...و كيف اللي تحبها تمشي تخطبها من بوها... والبنوتة تكبر كيف في ليلة ڨمرتها ضواية تتصدر...و امها على فراقها تبكي و تتكدر..

تعرف روحك كبرت كيف تمشي ثنية موش مفهومة لوين...اما مجبور تمشيها و لو حبو على الساقين... كيف ماعادش عندك طريق رجوع...و تعفس على قلبك و تتناسا ولو موجوع ... كيف الاصحاب تنقص على قبل...وكيف تعيش بعقلية مش عايش على امل...كيف تتوحش تحط راسك في حجر لميمة و ترمي همومك الكل...و تتوحش قعيدة في جنينة داركم القديمة وقهيوة و ريحة الفل..

تعرف روحك كبرت بعد برشا كفوف...و تبرد على الدنيا و على عيشتها معادش ملهوف...

عيدنا عيدين...فيه فرحة الصغار و فرحة الحاج اللي واقف بين يدين رب العالمين...

عيد اللمة... تزهى فيه النفوس و تنزاح الغمة...

تكثر فيه العينة...اللي يذبح..اللي يشوي و اللميمة في الكوجينة..

يتلم الشمل و العيلة...تفوح الروايح بين المشوى و البخورات في كل دار و كل تركينة...