رد بالك تحب راجل مالجواجي ، رد بالك تحن ، رد بالك تعيش حكاية مهبولة ،رد بالك تعنق ، رد بالك تغير وزادة وياك تهوى بضمير !! في الأول الرجال لكل محلاهم ، قداش يبانو متكلمانية ، قداش يظهرو ناس ملاح و- سايسين ،و قداه الراجل في أول رانديفو يكون يرعش عالمرا إلي بجنبو !! ،

أما بعد شهر شهرين ، وقت وقتين ، حلمة حلمتين ، عشقة عشقتٍين يتفرت المخبل في كبة ، و تحل الصرة تلقى برشة برشة وجيعة وخنار وأسرار و يتعرف إلي عمرو ماكان عالبال !!

،مافمة حتى راجل يبجلك الى روحو ، وإذا قال يحبك فهو يحبك على خاطر يحب روحو ، يحب شكون يتولها بيه ويبشبش بيه ، يموت ويفنى عاللي يتحير عليه ومايخمم كان فيه ، يحب ضحكتك ، يحب النوار ، تعجبو ريحتك إلي يشمها على بعد أميال ، أما وقت الصندي كل شي يرجع لحقيقتو ، يجي نهار اطيح بيك الدنيا ويطيح معاها جبل المحبة إلي بيناتكم ، يمشي لقدر ويهز معاه حاجة مزيانة خذات من عمرك سنين وعششت في بدنك شهور وليالي كايني بنت كرشك مش بنت قلبك ،

عزيزتي قبل مايفوت الفوت واللي عينو عليك يولي ما عادش عينو فيك ، تعلم حب مش اللي عندو في جيبو وإلا اللي عندو في جيبو ، مادور كان باللي عندو في قلبو ، خاطر اللي يعطي يعطي من قلبو وكل واحد قلبو اش فيه !