و اليوم شفت واحد يشبهلك ، أما ما يشبهلكش جملة ..  بينتاكم جبل حروف نجمش نلخصهم في كلمة .. في رقبتو شامة كيف اللي عندك اللي كنت نعيطلها أنا حمامة هه ، اللمعة في عينيه جبدتني ليك و الا ليه نتذكرش ، المفيد في خيالك حبستني ، كي صوتي كتمتني ..

هزتني حطتني من دمعي جردتني ، نفضتني ، اليوم .. تعديت قدامي ألبوم مقربط بخيوط الوحش ، حكيتهملك قبل بعينيا و انتي قتلي ما تحسش هه .. قتلي دافية و ياسر نية ، و قعدتك معايا ما تحبش .. قعدت نغزر و نثبت و نقول هو ؟ لا ! هو ؟ لا ! و قلبي رعف و طلع للسماء و ما هبطش و مكنوا الداء .. نفس الغزرة تكوي جمرة ، جهنم حمراء حرقتني خلاتني رماد و تعدات .. وقفت في قلب المدينة ، تحت القوس الخايخ وين تلاقينا .. وين ادعثرت و عليا ضحكت كي جرينا .. وين كتبنا بالفحم عالحيط هنا حبينا و تحبينا .. و هنا على بعضنا بعدنا كي تلزينا ..

عروقو الخارجة في زينك تفتني ، كي نتذكرك تقلي خارجين خاطرك ساكنتهم ، حروفك بكية تغصرني تمكني .. و على خرجتي فاك النهار تندمني .. سموريتو ، سوريتو المخططة اللي شريتهالك في صيف مالأصياف اللي فاتوا .. ضحكتو و التكميشة يسار فمو اللي عرفتها أول ما قرصتك و ضحكت ، تذكرتها كي ريتو .. صوتو المخلط برجولية عبد الحليم و شادية و هوما يدندنوا في "حاجة غريبة" .. صوتك يسمعوا اللي تحرم مالسمعان سنين ، صوتك حنين يتسمع بالقلب مش بالوذنين .. صوتك دواء فيه .. داء و ليا أنا شفاء .. كلو على بعضو رجعني ليك بعد ما فتك ببرشاا وقت ، تعديتك .. نساني الدنيا في لحظة ؛ و ذكرني اللي أنا في نهار حبيتك ..

ملاك بوذينة