نخمم..نخمم نبدل البلاد نسافر لبلاد بعيدة...نخمم ننزع فيا حاجة سماوها قلب و نزرع ماكينة جديدة...

نخمم نبدل الهوا...نخمم نعفس عالداء...نخمم في اللي تعدى و اللي جرا...

نخمم فيك...مازلت في الدنيا ماشي وحدك ولا لقيتلك شريك...نخمم في لون العسل في عينيك...نخمم في الشمس كيف بشعاعها تضرب و في لحظة دنيتي تاقف و نسرح فيك...

نخمم و مخي مشغشب...في سر يخبيه صدري بغزرة عيني مسرّب...

نخمم...نخمم وقتاش توفى الهدرة و تطيح الاقلام...نعيش في اليوما مخي في غدوة القدام...كيفاش باش تتعدى الايام...

نخمم من غيرك كيفاش نسكّر الحكاية...و من غير صوتك منين ليا الحان الغناية...

نخمم قداش من عام في الدقيقة قاعدة نكبر...نخمم نمشي باللي فيا من مواجع ولا عليك نزيد نصبر...

نخمم...نخمم شتعمل كيف تعرف اللي انا كيف قلت كرهت على قوة جهدي حبّيت...و كيف قلت مشيت في كل خطوة وقفت استنّيت...

نخمم فيا...في اللي بيا...في اللي ليّا و اللي عليّا...

نخمم وين باش يوصلني هبالي و تصويرة في خيالي و بين عينيّا...