أمي هي اللي عدّات حياتها تخيط في أحلامي بالحِلمة بالحِلمة...

و هي اللي منها كانت روحي كيف تموت تعاود تحيا بكلمة...

امي اللي سهرت، صبرت، خدمت، تعبت، طاحت و أنا في شونها و الضربة مش فيا جات، هي اللي تضربت...

امي هي اللي بكات و بلّت الدموع مخدتها بالليل و هي نفسها اللي في الصباح صوتها بالضحكة عَلاَّت... باش تداوي قلبي مالعِلاّت، باش فوق الحمل ما تزيدش عليا وجعات...

باش تقلي انت ِفيّا، قطعة مني، مدام أنا القوة، انت ما تصيبك ضربات...

أمي اللي تقلّي انت النفس، نحارب بيك الدنيا و مكملة على خاطرك رغم وقتي اللي حبس...

و الحلو اللي في فمي مرار.. و الزمان اللي عليا جار...و الحيوط اللي فيا نكرت و نساتني حتى الدار..

الدار اللي عرصها بيدي علّيت... و بنيتها بالحجرة و جراح يدّي ما داويت... باش في الدفى نربّيك...

تتدفّى في البرد و تتخلّع في الصيف... و كيف تكبر و يجينا الخاطب ضيف... نوريه بيتك، تصاورك، دبادبك و كرارسك و خطك اللي يعمل كيف...

و نوريه تراكنك... وين تتخبى مني و مالدنيا و تكتب سكاتك...

امي اللي مازالت تحارب و كيف نرخّ هي تكبّش... و تخليني نرجع نحب كيف نبرد و نقول ما نحبش...

اللي ما لبعيد تتفرج... و تدعي في الفجاري ربي ينجح، يعلّي و يفرّج...