و يا سعد اللي لقى صاحب صحيح في دنيا كل شي فيها ولى غالط ...و ياسعد اللي يلقى عبد في وجهو يقلو حقيقتو مش ينافق و يغالط...

يا سعد اللي لقى حبيب لعلل القلب طبيب...يدين عالاجراح قطن...قلب صافي يعطف و يحن...

يا سعد اللي عندو ظهر عليه يتكى...وذن تسمعك وانت تحكي وانت تتشكى...

يا سعد اللي عندو حنين بيه يحس... يتفقد بين الساعة و الساعة الاحوال و يجس...

يا سعد اللي كيف يغيب يتفقد...و كيف يطيح يلقا الف يد ليه تتمد ....

يا سعد المحبوب بين الناس...مقامو عالي كلمتو ما ترجع و لا تنداس...

يا سعد اللي في عينيه الفرحة مكتوبة ...و يا سعد اللي ميمتو عليه راضية متهنية عليه مش مشغوبة ...

يا سعد اللي عرف قيمة روحو بروحو ...بعد عالناس رتاح راسو و برات جروحو ...

يا سعد اللي رسم ثنية واضحة و مشاها ...و نفسو على الصبر و القوة رباها ...

و يا سعدك باللي في يديك ....مش عارف قيمتو و مغمضة عليه عينيك...