عندي برشا ماللّي خَيّرت السّكات عالكلام... و بتبسيمة خفيفة بديت السّلام...

عندي برشا ماللّي إخترت القِلَّة عالكَثْرة... و خيّرت نمشي خطوة خطوة و لا الجرية اللي تولّد طيحات و عثرة...

خيّرت نسمع الحقيقة اللي تجرح و لا الكذبة اللي بالوقت تفرّح و ترْجَع توجّع...

خيّرت المستقبل عالماضي... و خيّرت نعبّي وقتي الفاضي... و نبطّل نُطلب وصل الهاجر و فيه نراجي...

خيّرت الألحان الساكتة في عوض الصوت العالي... خيّرت نبدّل البلايص، نهزّ ضحكاتي في فليجة و نخلّي دموعي ورايا لتالي...

خيّرت نكون أنا حتى كان ما نعجبش... و نقول لا و في حقي ما نسلّمش...

خيّرتني أنا على برشا أحباب.. و خيّرت صاحب واحد على برشا أصحاب.. و خيّرت نسكّر باب و حلّيت أبواب...

خيّرت الوذن عاللسان...و خيّرت  الوحدة عالرفيڨ بو وجهين، الخاين و الخوّان...

خيّرت الشوي اللي يدوم عالبرشا اللي فيسع يفنى...و خيّرت نسامح أما عمري ما ننسى...