الليل بدا يليّل و في خيالك بديت نتخيّل , دنيا ظلامت و كساد الّليل و الدموع بدات تتميّل على رموش العين ; هاو بدا الليل يحيّر و في رموش عينيك نعشق و نتخيّل ; مش قتلي بش تجيني تمسحلي دموع عينيّا , شبيك بطيت ؟

خايفة لا تجيني و بهمومي نبكّيك و آنا الطفلة الّلي تحمّلت السكات و على خاطرك بلعت السكاكن بالدّمومات ; نخاف تجيني و ما نلقى ما نحكيلك نخاف تجيني و ننسى نرويلك ليلك , قدّاش منّي آنا ! و قدّاش حاسبة روحي قويّة قدّام العباد ! وينك توحّشتك راني ; توحشتك و توحشت كل شيء فيك,  توحشتك يا انتي ! فما نار في قلبي تشعل بالسكات , لا تطفيها التنهيدة و لا الدمعات ; فما برشااا وحش و كلام برشا وجيعة,  برشا عذاب و ليعة ,,

برشا تعب و برشا حب,  توحشتك , اما ما نجمش نقربلك , محرّم عليا , كيفاش فكّوك و خذاوك من بين يديا , مش عارفة انا سلمت فيك و الا انتي سلمت فيا , تعبني بعدك ما عادش عارفة شتايا من صيفي , حرقة قلب لا ليها بداية و لا نهاية , نتفكرك آخر مرة كي مشيت , ودّعتك بعيون تبكي و قلب موجوع , بنار والعة تذوب فيها الضلوع , معاد حاسة بشيء صدري مخلوع , روح ميتة في حالة نزوع , ناري و كويت بيها روحي , نحكيلك  شنية عمل فيا بعدك عليا , ايجا نحكيلك من نهارت الي مشيت انتي شنية صاير فيا ; قهوتي مرارت و ضحكتي صفارت و الخريف طيشلي اوراقي بنفخة ريح في الثنية , ايجا نحكيلك كيفاش الوقت ولا يدور عكس المنغالة , و السوايع تتعدا و انا سارحة في السقوفات المنسيّة , معادش فارقة معايا لا ليل لا نهار ; لكلها ايامات تتعدا و انتي بعيد على عينيا , لا كلام يضحك و لا صوتك يضوي عليا ظلام السهرية , برد في عز الصيف , منين تحبني نجيب شمس تضوي عليا , اغزرلي في عينيا خليني نحكيلك في  بعدك آش صاير فيا , ايجا نحكيلك على الايامات الي ماناش بش نعديوهم مع بعضنا , ايامات حفظت سوايعهم و دقايقهم قبل ما نعيشهم , سوايع كنت بش نزرعهم وردة في قلبي , وقت مانيش بش نعديه معنقتك , بجنبك نضحكلك , نضحكك ,

ايجا نحكيلك على حكاية ماناش بش نكتبوها مع بعضنا , حكاية يتيمة حزينة وفات قبل ما تبدى , حكاية ظلمة من حيوط قلبي عمرها ما خرجت , العنكبوت عشش فيها و الحنوشة سممت تراكنها , حكاية ماتت قبل ما تتولد و تشوف ضو النهار , ماتت كيفك انتي قبل ما تفرح بشبابها , بزينها بجوها بمحبتها و فرحتها , حكاية بدات بعينين مالفرحة تلق و وفات بدموع تغرق ! ,, نحكيلك  على دنيا ماناش بش نعيشوها مع بعضنا , دنيا كانت بش تكون مليانة ورد و ياسمين و نجوم تنور الليل , شمس في ايامات شتاء , نسمة باردة في نهار صيف , دنيا زينة بنينة من الف ليلة و ليلة , حكاية سرقتها من اعز كتاب عندي , لقطة في فيلم رومنسي البطل و البطلة في الآخر باسو بعضهم و عاشو فرحانين , ايجا نحكيلك على حاجات مازلنا ما عملناهمش , مازال فما ضحكات ما ضحكناهاش بش نضحكوها , مازال فما افلام بش نتفرجو فيها جميع و نعيشو كل لحظة فيها نتناقشوا في محتواها و نتخيلوا نهايات اخرى ليها , مازال فما برد في الاعوام اللي جاية مستحقة فيهم لايديك تعنقني و ما تسيبنيش , اللي تلمني بيهم الزوز بش تخبيني , بش ادفيني , مازال فما شتاء و مطر بش تصب علينا , بش نجريوا و نشطحوا تحتها انا وياك , مازال فما اوقات بش نبكي jyفيها و انتي بش تواسيني و تاقف معايا كيف كل مرة , مازال فما حلمات بش نحلموها و نحققوها , مازال فما اعياد بش نعديوها مع بعضنا , مازال فما صباحات بش نقوموا فيها بعضنا مالنوم , مازال فما ليالي بش نعديوها نحكيو على نهارنا كيفاه تعدا , مازال فما عركات بش نتعاركوهم و ما تفضها كان اكالغزرة الحنينة متاعك , مازال فما  غنايات بش نغنيوها مع بعضنا و نضحكو على اصواتنا اللي ما تصلحش للغناء , مازال فما موزيكا بش نسمعوها مع بعضنا و تطربنا بنفس الطريقة , مازال فما كلمات بش ننطقوها في نفس الوقت ! و نقعدو باهتين في بعضنا و نقولوا لها

لدرجة وصل بينا الانسجام ولينا نخمموا كيف كيف و نعلقو كيف كيف , مازال فما برشا حاجات و الاهم من هذا الكل مازلت ما عزفتليش النوتة اللي وعدتني بش تآلفها ب اسمي ,, كان جيت تعرف قداش نحبك راك ما خليتنيش , نحبك قد السماء قد عرض البحر و كبر البر , قد علو  الجبال و عدد الاشجار في الغابات , نحبك قد السحاب في نهار مغيم , قد قطرات المطر في شهر مارس , نحبك قد الضربات عالعود في غناء ام كلثوم و تكعريرها للكلام , قد حروف كلمة نحبك في غناء بوشناق و كلام درويش و محبة قباني لبلقيس , نحبك قد الرمل في شطوط العالم و حجر البني القديم , قد مشامم سيدي بو سعيد و الشيوعيين اللي بكاو على بلعيد , نحبك قد محبة الام لصغيرها قبل ما يتولد و لولد ولدها قبل ما يتوجد , نحبك قد محبة قيس لليلى و عنتر لعبلة , محبة الضحية لجلادها , النبتة للماء , الورقة لحبارها , نحبك محبة الشتاء لقطراتو , الربيع لخضاروا , الصيف لفرحة  صغاروا , و الخريف لرقصة اوراقو ,,, نحبك قد المرات اللي تقالت فيها نحبك باللغات الكل , بالعينين , بالنفس , بالكلام , بالاحلام , حتى في الافلام و زادة في سابع منام ..