نحب نحكي نحب نتكلمْ نحب نعبرْ نحب نتالّمْ .. حب نخزرْ للدّنيا ونتعلّمْ، نحب نبكي و نشكي نحب نعلّي الصّوتْ ونبوح بهمّي قبل ما نتخنقْ ونموتْ ، قبل ما نتغبنْ و يفوت الفوتْ، قبل ما نتحطْ في لحودْ وتابوتْ

نحب نمشي تحت المطرْ ، نحب ندغدغْ موجات البحرْ ، والفت اللّيلْ والسّهرْ ، نحب حاجة تحلّيلي المرّْ وتنسيني الغبنة والقهرْ ، فدّيتْ من كلام الغيرْ ، نحبْ نرفرفْ ونطيرْ ، نحبْ نرّجعْ قلبي عصفورْ صغيرْ ، نحبْ نحسْ اللي في الدّنيا مازال فمّة الخير، نحبْ نبوحْ ونداوي الجروحْ، نحب نجدّدْ الروحْ

انا المرا التونسية .. انا علجية وساسية وفتحية ، انا الحرّه المقديّه ، انا الغنيّه والزوّاليّه ، انا الحاذقة المسميّه .. انا تراكي و دوجه ، نخلّي الكبيده ممروجه ، وشقلابه كيف الموجه .. انا بنت رجال ، صياحي يهدّ جبال ، ما يغرني جاه ولا مال ، و نومرو واحد في الدلال

انا العسّول ، والخرنانة اللي تركب الغزّول ، واللي يشوف زيني يولّي بيا مهبول .. انا الحنينه، البنينه ، العاقلة ، الرصينه .. انا الشهلوله ، الدلّوله و المهبوله .. انا الزعبانه ، الرهدانه،  السكبانه المزيانه كلّي فيانه

شْكُونْ اللّي ماتْ؟ هامْ قَالُو نوّارَهْ من النّواراتْ  ، جُنْدِي رُوحُو في خدْمِةْ البلادْ  تِفْنَاتْ ،خِدْمْتُو يحْمِي فينا في الجْبُولَاتْ ،نلقاوهْ يْخَبّشْ بيديهْ وساقِيهْ بشْ يحمينا في الغصراتْ ا يا غَالِي لكْبِيدَةْ عْلِيكْ تشْواتْ و كي جَانَا الخْبرْ سالِتْ الدّمْعاتْ !


والله رَانِي حَايِرْ، سيّبُو الظّالِمْ وغدْرُو الضّميرْ اللي علا حُرْمةْ بْلَادُو ثايرْ و عْلا تْرَابْها من العْدُوْ غَايِرْ، منْظْرُو مذْبُوحْ حْزِنْ عليهْ الطيرْ الطايرْ ، خلّاولو دمّو في الجبلْ امايِرْ !  نبكِي عْلِيكْ بالدّمْ، اللي نَحْرِكْ معشّشْ  في قلبُو البغضْ  والسّمْ في ليلة رمضانْ في عوضْ ما نتْسامْحُو ونفِرْحُو شُفْنَا الهمّْ والغمّْ والبكية ملاتْ العينْ والفمّ !

بلادي يلّي غدْرُوكْ ! و بسكّينة في قلبك دغْرُوكْ بلادي يلّي ظلْمُوكْ ! وفي نهار فرحك كرّهُوكْ بلادي يلّي مرْمْدُوكْ ! نحّاولك العلم و بالسواد لفُّوكْ بلادي يلّي مرْجُوكْ ! وفي اعز اولادك رزاوُوكْ بلادي يلّي خنْْقُوكْ ! دفنو فيكْ صوت الحقْ وبالظلم حبّو ينطْقُوكْ بلادي يلّي ذلّوكْ

توطنت فيك القطعيّة بعد المْلُوكْ بلادي يلّي قَهْرُوكْ ! وبرخص التراب باعُوكْ بلادي يّلي يتمُوكْ ! من رجالِكْ الابرارْ حِرْمُوكْ بْلادِي يلّي كدّْرُوكْ ! وفي طعم الفرح وارّاحة نسّاوُوكْ بلادي يلّي عذْبُوكْ ! في عزّالنهار اغتصْبُوكْ يا بلادي ! يا مَجْد اجدادِي يا حاضر اوْلادِي يا مُسْتقْبِلْ احْفادِي عليك بالصّوتْ نبكي و نادِي نحب نراكْ حرّة و فيك نرجع نفْرح باعْيادِي زعمة وقتاشْ ؟؟؟ راني موْجُوعْ وحيرتي عليكْ ما تُوفاشْ

لا تخلو صحراء من سراب

لكن ليس العيب في انها صحراء

بل العيب في اننا

نعشق ذلك السراب