Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
هذيــان
Oumayma Karoui - أميمة قرويوقتاش بش تولي تجاوبني كي نحكي معاك ؟
وقتاه بش تسيب روحك و تطاوعني ؟
وقتاه بش تقربلي بقياساتي ؟ خاطر قياساتك بعاد ياسر !
وقتاه بش تجيني كي تتوحشني و معادش تشد روحك عليا ؟
وقتاه بش يولي عندنا وقت لبعضنا و لرواحنا انا و انت كهو ؟
وقتاش بش تولي مرايتي كي ناقف قدامك تشوفني كيما انا موش كيما انت تحب ؟
وقتاه بش تعرف الي مانيش ملايكة و ما تحشمش كي نسألك شنوة ما تحبش فيا و تقلي راك هكا و هكا و هكا ..؟
وقتاه بش تعرف الي أنا نحب صوتك و كلامك و سكاتك و حس النفس متاعك ؟
وقتاش بش نولي نحس و نرى إهتمامك الي مخبيه عليا تقول عفريت بش ياكلني وانت في الحقيقة خايف لا ياكلك انت ؟
وقتاش بش تسيب روحك يا ولد الناس ؟
وقتاش بش تعرف الي لبارح مشى و غدوة مش عارفين يجي ولا لا ؟
وقتاه بش تخطفني و نعيشو اليوم كيما نحبو و نشتهاو ؟
جاوبني نحكي معاك !!!
أخزرلي في عينيا !
بش نخسرو اكثر ملي خسرناه ؟
بش نتجرحو اكثر ملي تجرحناه ؟
بش نتكواو اكثر ملي تكويناه ؟
تقلي شبيك تحكي ب " احنا " ؟
أي ، خاطر مش وحدي " تكويت و ما ڨلت أحيت" ..
نعرف نفرق بين راجل حب قبل و راجل ما حبش ..
نعرف نحس براجل سكر الباب و ما جاش لبالو تجي مرا تخلعو عليه !
نعرف نفرق بين راجل تحرق و بين واحد ما يعرف النار كان في بونتة السيغارو ....
انا نعرف و انت تعرف ...
وقتاه ؟؟
وحي اللحظة
أميمة قروي
Website Design Brisbane
Tags: