غصة وقهرة .. عملت في القلب نحرة .. كلابهم يذبح بشفرة .. قديمة مصدية مصفْرة

يتْمِي عيارة بين البنات أمارة . نقطة ضعف وآش من يجي  يركب عليها و يصُفْ ..  ويزيد يتِفْ ،صحة ليها لقات باش تلوى الذراع وتسب وتقْذِف

بنت شارع سَمَاوها .. على حالها بكّاوها . بغصتها عقاب الليل مشّاوها . من قلوبهم الرحمة نسّاوها .. ونفاوها .. في همها تعاني مخلاوها  .عفوا عليها اخطاوها .. ذنب ماهو ذنبها ..طيرتوا النوم من اجْفَانها  

تربت وحدها ..ومدنيا دروس عبتْ .. وبرى كان وتات وسَبتْ .. التربية عمرها ما تنبتْ شوك والا شبتْ ..خدمة سنين وبنية  صغيرة شبابة على روحها تعبتْ .. باش وصلت ..

لا انتي كيفها ولا تشبهلك .. انتي تعفس و في دمعتها الدنيا تفْرحْلِك وهي وقت الشدة من لحمها تذْبَحْلِك

انتي تجرحها وبكلمة للحضيض ترجعها ..

هي موجة بلي تغرق لازم ترجع تتمد

هي صوت والصوت ميسكتوا حد

هي روح والروح مادة ميدخل فيها حد

نفسها عزيزة والعزة تفرق بين السبت والأحد

دمعتها نار جهنم وقلبها بدفاء ربيع معنبر

اقهر وقول الي تحب ..نو قمرة بين الكواكب تلب .. كلمتها مسموعة وراسها مرفوعة  ..محبتها للدنيا مشروعة ..صحيح موجوعة اما أسوام قوتها ملي تولدت مدفوعة.