منعرش علاش معادش نحس و لا هذا الكل قوة نخرج في عز البرد ونستحلهافي روحي

البرد يكل في عظامي وأنا باردة ساردة   مجرد من الإحساس عمر صغير بروح شايبة وجيعة خايبة  و بدن خايخ رزين ماكلتو ليام و السنين ضحكات تنين  لعقل  هايم سارح...

العالم و الدنيا الكل واحلة في قراجمي  تاعبة من حتى شئ ما غير سبب  قداش تظهر المسافة بعيدة ، بين الي يحس بيه الواحد والكلام الي يعبر على احساسه بعيدة بعيدة قد بعد سماء على الارض شئ مايتفسرش ...  غصيت بحروفي يا دنيا  روفي ربي  يعلم  بظروفي  

ظلام دامس الريح هامس  النجوم غايبة والقمرة هاربة سحابة كحلة بحر هايج موجة تقلب في حالي تهز وتنفض  ...نكره الحس نحب السكات  مانحبش نتعرف على عباد جديدة نكره لوجوه لغريبه نحب نسرح ونضيع مانحبش نطيع نهمل ونصيع في بر خالي  وبعيد شئ مايجرالي نحسب في خطواتي لين الوقت يواتى حتى الطريق رزنت عليه خطواتي والفم ماعدش حامل ضحكاتي

نرحل لبر خالي وبعيد ما نهز غير اوجاعي  نبعد على الناس عقلي يشكي وأنا الي نسمعله ومنها نريح كتفي المخلوع معه قلبي الموجوع  ... و اه من هاك القلب كان برد المخ شرد  زعمه يجي نهار الروح ترد ، تي ماهم يقولو الي مشى مايوليش وأنا ستانست نعيش جهامة بلا روح نضمد الجروح وتشهد لعروق وكان يتكلم هاك النفس ... عروق

مهجورة  دمعة محرومة ...   دنيا واقفة على صدرى تعفس وترفس وأنا نتكلم سكات ونبكي شياح وقتاش نرتاح نتفكر همومي نمسح دموعي بكمومي  يا روح لا تلومي وجيعتي مايدويها حد ...

مانيش محتاجه لحد قد ماني محتاجه لروحي  ...

يا ريتني نرجع صغيرة كيف ما في التصورة حتى ساعة ولا درج  بنية صغيرة  في حضن لميمة  تبكي بشهقة  وانتى تمسحلي دموعي تضمني لصدرك لحنين ونبرة صوتك لبنين تهدى الروح لتنين ..خسارة أنا كبرت و مانحبش نحير منام عينك .