حبيت نبكي و نفرهد روحي نضمد جروحي و نسي روحي بروحي... خسارة  دموعي مطوعتنيش  موش مني  منها هيا محبتنيش ... انا نقلها اخرج يا دميعة خليني نتفرهد حتى سويعة... وهي مكبشه تشعل في الوجيعة و تدافه بنار الليعة ...  

حبيت نقص الحمل على جواجيا  ونسيل دمعة على خديا و نرتاحو لثنين قداش مني انا و قداش منه هالوقت اللي ينسي ...

حبيت نبكي موش ضعف ام القوة لربي ...  شبيني انا نحب نحزن كيف اندادي نهج و نشق الخلاء المخلي  و يبدا العرض نبكي نكسر  نعيط بأعلى صوتي لين نتهد  نطيح في لارض و نخرج الي فيا الكل وجيعة عام و لا هوم عامين نسيت مانتفكرش  ... نحب الدمعة تهبط و ماتشاورش تسري عالخدود وماتحرقش ... حبيت ام خسارة  جفوني ما تضناش ماتخلفش  الدموع ونقعد نتشحت بربي حتى دمعة  في السبوع ...

وتبقى لمعه هي تهرب مني و انا نجري وراها جريت ملحقت وفي قلبي تحرقت ... دنيا بدات تظلام  برشا سكات  دخلاني نعيط في راسي صوت طفلة صغيرة تبكي و تعيط ياسر جوجمة و تخلويض  مخي شيط ...