منعرش علاش معادش نحس و لا هذا الكل قوة نخرج في عز البرد ونستحلهافي روحي

البرد يكل في عظامي وأنا باردة ساردة   مجرد من الإحساس عمر صغير بروح شايبة وجيعة خايبة  و بدن خايخ رزين ماكلتو ليام و السنين ضحكات تنين  لعقل  هايم سارح...

العالم و الدنيا الكل واحلة في قراجمي  تاعبة من حتى شئ ما غير سبب  قداش تظهر المسافة بعيدة ، بين الي يحس بيه الواحد والكلام الي يعبر على احساسه بعيدة بعيدة قد بعد سماء على الارض شئ مايتفسرش ...  غصيت بحروفي يا دنيا  روفي ربي  يعلم  بظروفي  

حبيت نبكي و نفرهد روحي نضمد جروحي و نسي روحي بروحي... خسارة  دموعي مطوعتنيش  موش مني  منها هيا محبتنيش ... انا نقلها اخرج يا دميعة خليني نتفرهد حتى سويعة... وهي مكبشه تشعل في الوجيعة و تدافه بنار الليعة ...  

حبيت نقص الحمل على جواجيا  ونسيل دمعة على خديا و نرتاحو لثنين قداش مني انا و قداش منه هالوقت اللي ينسي ...

مخيبها كي تحس روحك فارغ من داخل حتى النفس كايدك تحب تتكلم ما تنجمش تحس روحك بارد كيف الحيط المندي  واعصابك مرخوفة عالاخر توحل كاينك ماتعلمتش الحروف وماتعرفش تتكلم ...

مخيبو الاحساس الغريب الموش مفهوم اك  المحبوس في صدرك لا تعرفو لا وجيعة لا رزن

مخيبها كي تجي تتنهد توحل التنهيد فالحلق كيف الغصة ماتخرج الا ما طلعلك روحك....مخيبها كي تحب تمشي و تتعب من اول خطوتين وتخونك رجليك و تحس بفشلة في ركيبك ما توصل الا ما تتهد  ... مخيبها كيف تطلع الدروج تبد تنهج وتحس النفس باش يتقطع عليك كاينك هاز الدنيا الكل على كتافك ...