حبيتو .. وتقلبت احوالي

ملي عرفتو نسيت احلامي

كلامك قداش يحلالي .. صوت نفسك طالع هابط وتنهيداتك ساعة ساعة ليهدوا أجبالي

كذبك فهتيمامك ونشدانك على أحوالي

وبلادتك ليتجيب أجالي

وكي تغلط وتنسي وتقلي سامحني مشى منبالي

ما الحب الا للحبيب الأول .. يمكن صحيح ويمكن غالط . اما زعما انجم نحب غيرك ؟ يعني فما على وجه هلبصيرة يملالي عيني

وصوتو كيما صوتك ونعشقو وحتى صياحو يحلالي؟

نبقى ذكية زعمة قدام راجل آخر وكيفك انتي وكل سؤال صعيب يتسأل فيسع نلق الجواب وساعات.. نرتجل؟

فما راجل آخر نجري مع رنتو على تليفوني ونهز فيسع.. ونستعجل؟ ونجري ونرمي العالم ورايا ! وكل شئ قدامك ..يتأجل!

يقولو ناس قبل ترصيليش بعد السيف نعلق.. منجل؟

مش اني نحبك؟ مش انتي خليتني نحب روحي !

ونضرب سوايع نحمر ونكحل وكان نلقى نلبسلك خلاخل فلمكاحل

رغملي نحسك ساعات على حبي باخل زعما حبي صعب عليك وبقيت واحل؟

زعما يجي نهار وتقلي بسلامة راني راحل !

اي على ذكر الرحول .. حلمت بيك فنهار قريب منهارات .. ريتك فمنامتي خاين عهدي وبايع شهدي ..حسيت بغصة وستنيت فيسع نفيق منها والحلمة تشمتت فيا وبطات وماخسرت ما

كملت ريتك ماشيلها والغريبة نتبسملك !

مش غريبة بربي؟ ..

تي لا مش الحلمة نقصد اني نتبسملك مش غريبة.؟

شهلمهازل!

تو نحلف على حبك نعتزل

ونطلع نكذب ونرجع نتنازل

وننسى اول ما نسمعك بإسمي تتغزل

ويتشقلب حالي وكياني لكلو يتزلزل

تي نحبك حتى كيف تبدى فيا تغزل

ونسامحك ديما حتى كيف تجي علجرح وتتعمد تنزل

منجمش مننساش ونسامح على اي غلطة !وجودك فحياتي أبجل ومع الوقت كل شئ يتصلح ويتبدل

وميزاجيتك تتعدل..