حكايتنا مسرارة متاع عباد مزهارة و عندها في رواحها ما تقول بالظبط كيف الخديمة إلي حبت الأمير ، حكاية تتحير مل الليل لليل ، حكاية نحبك وقتاش تحكم عليا ؛ تحبني ما نعنيلك شي و لا تتزعبل عليا ؟

حكايات توحشتك وينك و ويني أخبارك و أسرارك ؟ حكايتنا ليل يطول بكلمتك و غنايتك و نغماتك ... حديثة : مسكينة أنا نوصي فيك على روحك ، خايفة عليك و إنتي تتناسى و إي إي نسمع فيك ... الحكاية أنا و إنتي زوز مراكب في البحر تايهة و حكاية كوابيس . مالية الليل بالعيون الفايقة ، حكايتنا تاج على راس أميرتنا النايمة .

حكايتنا صباط البطال مل فقر فضح الساقين الحافية و العينين الذابلة حكايتنا تزرع الأحلام و تشريها بأغلى الأسوام تترفع للسماء و كي يطول عليها الوقت تتذبح بسكينة حافية ، حكايتنا بلا ساس و لا راس ، المفهوم فيها أنا بالنسبة ليك عز الناس و إنتي أغلى حاجة فيا و إنتي الراجل إلي ماليلي عينايا إلي قريت عليه في الكتب و المثل الأعلى للذكورة في الحب ... أنا و إنتي متهنين لاباس بينا أما وقتاش نوليو خرافة على كل لسان و وقتاش نتهناو كيما كل زوز مل ناس ....