قعدت وين ما ناقف قدّام المراية نقوّي روحي و نقول و ما نحسّش ما نحنّش ما نحبّش . لاعبة دور الثلج بامتياز و حاطّة في قلبي الغلطة ما لازمهاش تتعاود القلب ما لازمش يتحل و السّنة أولى نسيان نجحت فيها أما مازالو السنين يستناو القدام .

لين فاض الكاس و كثر الكلام , جيت نتلفّت نلقا الوحدة عاملة حذايا سياج و النّاس اطيح و تقوم لاهية في نوارها و تتخبّط على زهرها و انتي وحدك شاد جنبي تتبسّملي تخزرلي بعين اللّمعة  على وجهك نور  يدّك ممدودة تقولش ملايكة في حلمة اددّش فيّا تقولش كي غير تعلّمت نبدّل الخطوة خايف نطيح  نتكربس نضيع من يديك و عقدت فيك النواور لي عندي قلت لروحي ما كيفك حد وحدو باش يكمّل معايا الطريق  يخاف عليّا لا ياكلني الغريق و يغار علّيا من نسمة تمسني و لحن غناية في لحظة سكات ضحّكني و لبعيد هزني ..

وحدو مخزن أسراري و أنا مخزن أسرارو  حضنو شبر مالجنّة يبعّدني على الدّنيا و في الدّنيا ينسّيني هو لي باش باش يهزني في طريق طوييييل  ظلام قمرتو و نجومو تتغامز  سحابو بأسامينا يحكي و يتهز ... هو لي باش يحطني ورا ضلوعو  يخبيني ورا عينو و يجري يلوّج عليّا مع النّاس  يحلف و يعاود ما ريتهاش .. وحدو النّسخة الأصليّة متاع شخصيّات المسلسلات التركيّة , إلّي يعنّق في عز السّرحة و إلّي يبدّل الحزن فرحة ...

كبرت الحكاية و كبر الخيال و ولّى مسرحيّة حليت عينيا لقيتك عمّال  تبعد و تظلام الثنيّة  نشمشم في ريحتك لي ضاعت عليّا  لقيتني أنا لي عيني تلمع كي نحكيلك و وجهي ينوّر كي نراك  أنا لي نددّش فيك و ندلّل  نغار  نحزّر و نصفّق على حاجاتك الباهية و نجاحاتك المتتالية . لقيتني حاطتك قبل روحي و قبل الدّنيا , خايفة لا نوجعك  كي تغيب نسئل و نطل : خايفة لا تغيب  نوحل نتمهمش  نتشل و طلعت في عوض ما نحب على كلام مزيان ليّا يتقال نحفّظلك فيه الكل , خايفة عليك لا اطّيح من عيني و ما نجّمش نعلّيك ...

لقيتني نحس و نحن و نحب اما لا لا معاك ما نبكيش , لا قول بكيت و خبيت خفت نعاود نضيع  ننسى النّسيان و تتطوال الثنيّة  يغمني الظلام و رجعت للمراية نجري نرا في في روحي نقنع فيها بالمبادئ الموجودة الكل إلّي الدّنيا مود و إلّي نقنعو بيه رواحنا نعيشوه و إلّي الثلج لي كان في صدري عل اليسار اليوم بدا يذوب  بالقوّة و عزّة النّفس لازم يرجع و إّلي الحب لي راجعتلو باب حلاّنو يوجع و الحاجات الصغار لي ريتهم فيك كلها كبرت بخيالي انتي خاطيك و طرح الشّيش بيش لي باش نرجع نلعبو معاك كلوّ زهر وقت لي أنا زهري واقف أما معوّج متمرّد

الحب لازمو قوّة و أنا كي تبطى عليّا نبكي  نلقا روحي نحسني حبّك  فجأة كرهك  عهرك و قلّة حياك و نفهم لي البرود لي قابلتك بيه علاك عندي مرّضني أما داواك و عداك بردي لي نسّاك فيّا و نسيت للحب ثتيا ... الباب  باش نسكرو طريقك باش ننساه , كي تجي تشوف ما عليك ملام عليا الملام و الثنيّا بلا بيك مش ياسر ظلام , اكتشفت لي كي ناديتك و قتلي جيتك لقيتك بلاش النوّار لي زرعتو فيك  وجهك ذابل  طحت في خيبة أمل و رغم لي جيتك في حياتي ربيع و انتظارك كي ربحان الخير عالشّر

فيبالي فيبالك و ما تحبّش تحكي فيبالي تعرف لي نحسّك و نحبّك و ما خيبها نقول نحبّك بعد ما كل عرق في بدني حكالك و شكالك و عينيّا ظهرو سهر ليالي تضحك فيهم مع غيري و أنا نقلّك أعمل لي يحلالك و سكاتي فسّرلك و خيالي بيبالك  قلّك نودعك و نوعدك لانحنلك  لانحسّك  لا نكون سبب في قلق يجراك سنة أولى نسيا بلاصتي  المتحولة مذبالة وقيّت عودة وفات الحلمة وفات الرّحلة